टाइगर कप भलिबलको उपाधिका लागि गण्डकी र टिपटप भिड्ने
हाम्रा कुरा
प्रकाशित २०८० माघ ५ शुक्रबार
1.2k
Shares
पोखरा । पोखरामा जारी चौथो टाइगर कप भलिबल प्रतियोगितामा पुरुषतर्फ डिफेन्डिङ च्याम्पियन गण्डकी प्रदेश फाइनलमा प्रवेश गरेको छ ।
गण्डकीले उपाधिका लागि टिपटप हेल्प नेपाल स्पोर्टस क्लबसँग भिड्ने भएको छ । शुक्रबार भएको सेमिफाइनलमा आ–आफ्ना खेल जित्दै गण्डकी र हेल्प नेपाल उपाधि नजिक पुगेका हुन् ।
गण्डकीले सशस्त्र प्रहरीको एपीएफलाई सोझो ३-० को सेटमा र टिपटप हेल्प नेपालले श्रीलङ्का आर्मीलाई ३-१ को सेटमा पराजित गरेको हो ।
गण्डकी पहिलो र तेस्रो संस्करणको टाइगर कप जितेको थियो । टिपटप हेल्प नेपाल भने पहिलोपटक फाइनलमा पुगेको हो ।
प्रतियोगिता अन्तर्गत महिलातर्फ तेस्रो स्थानको उपाधि त्रिभुवन आर्मीले जितेको छ । शुक्रबार भएको प्रतिस्पर्धामा आर्मीले नेपाल पुलिस क्लबलाई ३-१ सेटले हराएको हो ।
तेस्रो स्थान आर्मीले रु १ लाख २५ हजार ५५५ रुपैयाँ नगद पुरस्कारको साथमा ट्रफी, मेडल र प्रमाणपत्र हात पार्यो । महिलातर्फको उपाधिका लागि डिफेन्डिङ च्याम्पियन एपीएफ र चन्द्रागिरी न्यू डायमण्ड भिड्ने भएका छन् ।
प्रतियोगिताको फाइनल खेल शनिबार हुने आयोजकले जनाएको छ । प्रतियोगिताको दुवै इभेन्ट विजेताले रु ५ लाख ५५ हजार ५ सय ५५ र उपविजेताले नगद रु २ लाख ५५ हजार ५ सय ५५ रुपैयाँ नगद पुरस्कार प्राप्त गर्नेछ ।
