-
-
-
-
तिमी आज भन्दैछौ अब सहन गाह्रो भैसक्यो
थोरै माया गर्ने बानी परेको तिमीलाई
मेरो माया धेरै भयो जस्तो छ
तिमीले मलाई र मैले तिमीलाई गर्ने
मायाको अर्थ बेग्लै भयो जस्तो छ ।
आज तिमी भन्दैछौ
‘तिमी र म उस्तै छैनौँ’
तर तिमीलाई त
तिमीले भन्दा बढी मैले बुझेको थिएँ
उदाइरहेको सूर्यको किरणमा हराउने म
तिम्रो साथमा
सन्ध्याकालीन किरणमा रमाउन थालेको थिएँ ।
मायामा मान्छे अन्धो हुन्छ भन्थे
सायद हो पनि
दायाँ बायाँ अघिपछि
कतै नहेरी
तिम्रो हात समाउन थालेको थिएँ
तिमी आज भन्दैछौ
‘हाम्रो कुनै भविष्य छैन
तर मैले त तिमीसँगै
हाम्रो संसार सजाउन थालेको थिएँ ।
सजिलो त छैन तिमीलाई
अनि तिमीले अलिअलि गरेको माया भुल्न
तर मैले अब भुल्नै पर्छ
धेरै फुलेँ तिम्रो बहानाको बगैँचामा
अब म आफ्नै चाहनाको बगैँचामा फुल्नै पर्छ
तिमीले मलाई र मैले तिमीलाई
गर्ने मायाको अर्थ बेग्लै भयो जस्तो छ
थोरै माया गर्ने बानी परेको तिमीलाई
मेरो माया धेरै भयो जस्तो छ ।
