बिहीबारदेखि नेपाल र क्यानडाबीच एक दिवसीय श्रृंखला [फोटोफिचरसहित]

हाम्रा कुरा

प्रकाशित २०८० माघ २४ बुधबार

काठमाडौँ । नेपालले क्यानडासँग बिहीवारदेखि शुरु हुने एकदिवसीय क्रिकेट श्रृंखलामा उत्कृष्ट प्रदर्शन गर्ने लक्ष्य राखेको छ । आईसीसी विश्वकप लिग–२ को तयारी स्वरुप खेल्न लागेको श्रृंखलामा नेपालले उत्कृष्ट क्रिकेट खेल्ने लक्ष्य राखेको छ ।

नेपालले क्यानडासँग तीन खेलको श्रृंखला खेल्दैछ । सो श्रृंखलाको पहिलो खेल बिहीबार हुँदैछ । नेपाली क्रिकेट टोलीका कप्तान रोहितकुमार पौडेलले अधिकांशले प्रधानमन्त्री कप खेलेकाले तयारी छोटो रहेको उल्लेख गर्दै पछिल्लो दुई दिनमा टोलीले पनि योजनाअनुरूप काम गरेको बताए ।

उनले प्रधानमन्त्री सबै खेलाडीसँग आफू सम्पर्कमा नै रहेको र अहिलेसम्म सबै खेलाडी फिट पनि रहेकाले राम्रो क्रिकेट खेल्ने बताए ।

नेपालले दोस्रो खेल शनिबार र तेस्रो तथा अन्तिम खेल आगामी सोमबार खेल्नेछ । नेपाली क्रिकेट टोलीका प्रशिक्षक मोन्टि देसाईले घरेलु प्रतिष्पर्धा प्रधानमन्त्री कप क्रिकेटबाट खेलेकाले टोली राम्रो रहेको बताए ।

केही नयाँ खेलाडी रहे पनि उनीहरू दुई दिनभित्र ‘ह्याप्पी ड्रेसिङ रुम’ मा राम्रोसँग श्रृंखलाका लागि तयार रहेको बताए ।

नेपालका पूर्वप्रशिक्षक पुबुदु दासानायकेको प्रशिक्षणमा रहेको क्यानडा अनुभवी केही खेलाडी बिना नै नेपाल आएको छ ।

क्यानडाले पनि मार्चदेखि संयुक्त अरब इमिरेट्स (यूएई) मा आईसीसी क्रिकेट विश्वकप लिग–२ को शुरुआत गर्दैछ । त्यसका लागि क्यानडा नेपाल आएको हो ।

यद्यपि क्यानडाको टोलीमा अधिकांश खेलाडी नयाँ छन् । कप्तान साद बिन जफरले विश्वकप लिग–२ को तयारीका लागि नेपाल नै राम्रो स्थान र टोली रहेको उल्लेख गर्दै यो श्रृंखलामा राम्रो क्रिकेट खेल्ने धारणा राखे ।

केही अनुभवी खेलाडी चोटका कारण टोलीसँग बाहिर रहेको उल्लेख गर्दै अहिले टोलीमा ६ नयाँ खेलाडी समावेश भएको बताए ।

अहिले टोली निर्माण प्रक्रियामा रहेकाले यो टोलीबाट धेरै आशा पनि राखेको उनको भनाइ छ । प्रशिक्षक दासानायकेले एक दशक अगाडि क्यानडा धेरै राम्रो टोली रहेको उल्लेख गर्दै पछिल्ला समय टोली राम्रो लयमा फर्किएको धारणा राखे ।

अहिले राम्रो टोली रहेकोले नै आईसीसी विश्वकप लिग–२ को सर्कलमा परेको धारणा राख्दै यूएई जानुअघि आफ्नो टोलीले राम्रो तयारी गर्ने बताए ।

उनले नेपालसँग क्यानडाले धेरैभन्दा धेरै क्रिकेट खेल्ने राम्रो सम्बन्ध स्थापना गर्ने पनि धारणा राखे । पुबुदुले पछिल्लो समय नेपाली क्रिकेटले धेरै प्रगति गरिरहेको र ती सबै खेल आफूले हेरेको पनि उल्लेख गरे ।

नेपालसँग आफ्नो छुट्टै सम्बन्ध रहेको उल्लेख गर्दै उनले नेपालमा जुनसुकै जिम्मेवारीमा रहेर फर्किंदा खुशी लाग्ने धारणा राखे ।

नेपाली क्रिकेट टोलीका कप्तान रोहितले क्यानडासँग खेलका लागि केही नयाँ खेलाडीका लागि अवसर हुने बताए ।

क्यानडासँगको खेलका लागि रोहितको कप्तानीमा कुशल भुर्तेल, आसिफ शेख, देव खनाल, कुशल मल्ल, भीम सार्की, आरिफ सेख, पवन सर्राफ, सोमपाल कामी, हेमन्त धामी, रिजन ढकाल, सूर्य तामाङ, ललितनारायण राजवंशी, आकाश चन्द र अनिल साह छन् ।

यू–१९ विश्वकपमा राम्रो प्रदर्शन गरेपछि कप्तान देव र आकाश चन्दले टोलीमा अवसर पाएका हुन् । पवन सर्राफ, सूर्य तामाङ, अनिल साहले प्रधानमन्त्री कप एकदिवसीय क्रिकेटमा राम्रो प्रदर्शन गरेपछि क्यानडासँगको श्रृंखलामा अवसर पाएका हुन् ।