लामो समय रोकिएर शुरु भएको संसदमा सांसदको खडेरी, विधेयक अलपत्र

हाम्रा कुरा

प्रकाशित २०८० फागुन १० बिहिबार

काठमाडौँ । प्रतिनिधि सभाको बैठकमा सांसदहरुको खडेरी भएको छ । लामो समयपछि बसेको बैठकमा नियमित विधेयकहरु पेश गरी पारित गर्नुपर्ने बेलामा सांसदहरुकै खडेरी लागेपछि बैठक स्थगित गर्नुपरेको छ ।

बिहीबार संसद्‌मा ६५ जनामात्र सांसद उपस्थित भएपछि संसद् बिना कुनै निर्णय स्थगित भएको हो । शून्य र विशेष समयको कार्यसूची सकिएपछि राजनीतिक दलसम्बन्धी ऐन (दोस्रो संशोधन) विधेयक पेस गर्ने कार्यसूची रहेकामा एमाले सचेतक महेश बर्तौलाले गणपूरक संख्या यकिन गर्न माग गरेका थिए ।

संविधानको धारा ९४ मा कुनै पनि प्रस्तावमा निर्णय गर्न एक चौथाई सदस्यको उपस्थिति आवश्यक पर्छ । एक चौथाई हुन ६९ सांसद आवश्यक हुनेमा संंख्या यकिन गर्दा ६५ जना मात्र पाइएपछि सभामुखले बिहीबारका बाँकी सबै कार्यसूची स्थगित गरी शुक्रबार बिहान ११ बजेका लागि बैठक डाकेका हुन् ।