- सुन चाँदी दर
- विनिमय दर
- नेपाली पात्रो
- राशिफल
झापा । झापाका सहकारी संस्थाहरुमा तोडफोड र चोरी हुनेक्रम रोकिएको छैन । मंगलबार राष्ट्रिय सहकारी दिवसकै दिन झापाको गौरादह नगरपालिकाका दुई वटा सहकारी लुटिएका छन् ।
मंगलबार राति गौरादह नगरपालिका वडा न ५ स्कूलचौन बजारमा रहेको जनहित सहकारीमा कार्यालय फोडेर चोरी भएको प्रहरीले जनाएको छ । त्यस्तै सोही वडाको चप्रामारीमा रहेको महारानी झोडा सहकारीमा पनि गएराति नै चोरी भएको जनाइएको छ ।
इलाका प्रहरी कार्यालय दमकले घटनाबारे जानकारी प्राप्त भए लगत्तै चोरीमा संलग्नहरुको खोजीकार्यका लागि प्रहरी टोली परिचालन गरिएको जनाएको छ ।
पछिल्लो समय झापामा सहकारी लुटपाटको घटना बढ्दै गएको छ । गत चैत ५ गते राति गौरादह नगरपालिका वडा न ए ९ बैगुनधुरास्थित शुभलक्ष्मी बचत तथा ऋण सहकारी संस्थाको सेवा केन्द्रबाट करिब १२ लाख नगद र सरसामान चोरी भएको थियो ।
त्यस्तै केही दिनअघि हाम्रो नेपाल बचत तथा ऋण सहकारी संस्थाको हल्दिवारी गाउँपालिकाको मंगलवारेमा रहेको शाखामा चोरी गर्ने प्रयास भएको थियो ।
त्यस्तै कर्णाली बचत तथा ऋण सहकारी संस्था बिर्तामोड ४, साना किसान कृषि सहकारी संस्था हल्दिवारी ४, एकता बहुउद्देश्यीय सहकारी संस्था हल्दिबारीलगायतका संस्थामा चोरी र तोडफोडका घटना भएका थिए ।
गत फागुन १० गते जिल्लाका विभिन्न सहकारी संस्थाहरुमा लगातार भइरहेको चोरी र तोडफोडको घटनाप्रति झापा जिल्ला सहकारी संघले जिल्ला प्रशासन कार्यालयको ध्यानाकर्षण समेत गराएको थियो।