निर्यात घट्यो, बैशाखमा एक खर्ब ३५ अर्बको मालसामान आयात
हाम्रा कुरा
प्रकाशित २०८१ जेठ ७ सोमबार
1k
Shares
तस्बिर – फाइल ।
काठमाडौँ । गत बैशाख महिनामा एक खर्ब ३५ अर्ब रुपैयाँ बराबरको मालसामान आयात भएको छ । भन्सार विभागको तथ्यांक अनुसार २०८१ सालको पहिलो महिनामा यसअघिका ९ महिनाको तुलनामा आयात बढेको छ । त्यस्तै अघिल्लो वर्षको तुलनामा भने आयातमा सामान्य गिरावट आएको देखिएको छ ।
विभागका अनुसार बैशाख महिनासम्म १३ खर्ब ३ अर्ब रुपैयाँ बराबरको मालवस्तु आयात भएको छ । चैत महिनासम्म ११ खर्ब ७६ अर्ब रुपैयाँ बराबरको वस्तुको आयात भएको थियो । यो मासिक औसत १ खर्ब २९ अर्ब रुपैयाँ बराबर हो । यो महिना समेतको आयातले कुल आयात ४.६५ प्रतिशत बढी हो ।
त्यस्तै यो आयात अघिल्लो वर्षको भन्दा २.३९ प्रतिशत कम हो । अघिल्लो वर्षको १० महिनामा १३ खर्ब ३५ अर्ब रुपैयाँ बराबरको बस्तु आयात भएको थियो ।
यो वर्षको दशौँ महिनामा आयातमा सुधार हुँदा निर्यात भने घटेको छ । चैत महिनासम्म मासिक औसत १२ अर्ब ६६ करोड रुपैयाँ बराबरको मालवस्तु निर्यात भएकोमा बैशाख महिनामा १२ अर्ब २२ करोड रुपैयाँ मात्रै निर्यात भएको तथ्यांक छ ।
अघिल्लो वर्षको आधारमा पनि १० महिनाको आयात ३.६१ प्रतिशतले घटेको हो ।
यो व्यापारसँगै बैशाख महिनासम्मको व्यापार घाटा ११ खर्ब ७७ अर्ब रुपैयाँ पुगेको छ जुन २.२६ प्रतिशत कम हो । अघिल्लो वर्ष बैशाखसम्म १२ खर्ब ४ अर्बको वस्तु आयात भएको थियो ।
यो अवधिमा देशले १ सय ६८ देशसँग व्यापार गरेको छ । त्यसमध्ये १ सय ३३ देशसँग व्यापार नोक्सानमा हुँदा बाँकी ३५ देशसँगको व्यापार नाफामा रहेको विभागले जनाएको छ ।
