काठमाडौँ । सहकारी पीडितहरू काठमाडौंको माइतीघर आइपुगेका छन् । माइतीघरमा प्रदर्शनसहित सहकारी पीडितले रिले अनशन समेत शुरु गरेका छन् ।
सहकारी पीडित बचतकर्ताहरू सङ्गठित हुँदै सरकारले सहकारी सञ्चालकबाट बचत फिर्ता गराउन माग राख्दै प्रदर्शन गरेका छन् ।
अभियानका अध्यक्ष कुशलभ केसीले सहकारी पीडितहरूको बचत फिर्ता नभएसम्म आन्दोलन जारी राख्ने बताए ।
देशभरिका संकटग्रस्त सहकारी पीडित बचतकर्तालाई संगठित गर्दै अगाडि बढेको सहकारी बचतकर्ता संरक्षण राष्ट्रिय अभियान महासंघले आन्दोलन घोषणा थालेको हो ।
महासंघका अध्यक्ष कुशलव केसीले शुक्रबार ११ गते बिहान ११ बजे माइतीघर मण्डलाबाट प्रदर्शन शुरु गरिएको जनाए । सरकारसँग विगतमा भएका कुनै पनि सम्झौता कार्यान्वयन नभएकाले सहकारी पीडितहरू तेस्रो चरणको आन्दोलनमा उत्रिनु परेको उनको भनाइ छ ।
अध्यक्ष केसी यसअघि पनि झण्डै तीन हप्ता आमरण अनसनमा बसेपछि स्वास्थ्य अवस्था नाजुक भइरहेका बेला सरकारले सम्झौता गरेको थियो ।
सहकारी पीडितहरूको माग पूरा नभएसम्म अब आन्दोलन देशैभरि सशक्त रुपमा अगाडि बढ्ने उनले बताए ।
नेपालगञ्ज, चितवन र धरानमा पनि आन्दोलन एकैपटक शुरु हुने अध्यक्ष केसीले जानकारी दिए ।
आफूहरूले तत्कालीन भूमि व्यवस्था तथा गरिबी निवारणमन्त्री रञ्जिता श्रेष्ठ चौधरी र वर्तमान मन्त्री बलराम अधिकारीसँग विभिन्न सम्झौता गरे पनि अहिलेसम्म ती सम्झौता पालना नभएकोले तेस्रो चरणको आन्दोलन गर्नु परेको उनले बताए ।
आफ्नो रकम पाउनु पर्ने बाहेक अरु केही माग आफूहरुको नरहेको र संगठनमा आबद्धता तथा जनसमर्थन बढ्दै गइरहेको पनि उनले जानकारी दिए ।
देशभरका दर्जनौँ सहकारीका हजारौँ पीडितहरु आफ्नो संगठनमा आबद्ध रहेको र माग पूरा नहुँदासम्म आन्दोलन झन चर्किदै जाने अध्यक्ष केसीले दाबी गरे ।
सहकारी बचतकर्ता संरक्षण राष्ट्रिय अभियानले सरकारसँग भएको सम्झौता कार्यान्वयन नभएसम्म माइतीघर मण्डलाबाट शान्तिपूर्ण अनिश्चितकालीन धर्ना तथा रिले अनशन प्रदर्शन शुरु गरेका हुन् ।
