काभ्रे । बेथानचोक गाउँपालिका खेलकुद विकास समितिको आयोजनामा भएको पाँचौँ बेथानचोक कप जिल्ला स्तरीय आमन्त्रण पुरुष भलिबल प्रतियोगिताको उपाधि खानीखोला गाउँपालिकाले जितेको छ ।
मण्डनदेउपुर नगरपालिकाको टिम दोस्रो हुँदा आयोजक बेथानचोक र महाभारतले तेस्रो स्थानमा चित्त बुझाएका छन् । प्रतियोगितामा प्रथम हुने टिमले नगद रु ८० हजार, द्वितीयले रु ५० हजार, तृतीयले २०–२० हजार साथमा ट्रफी, मेडल र प्रमाणपत्र हात पारेका छन् । ढुंखर्कस्थित पार्वती मा।वि।को खेल मैदानमा आयोजित प्रतियोगितामा कुल १७ वटा टिम आमनेसामने भएका थिए ।
प्रतियोगिताका उत्कृष्ट खेलाडी खानीखोलाकै उमेश रानामगर घोषित भए । समापन कार्यक्रममा सम्बोधन गर्दै बेथानचोक गाउँपालिकाका अध्यक्ष भगवान अधिकारीले गाउँपालिकाले बर्सेनि गर्दै आइरहेको सो प्रतियोगितामा १७ टिममा सहभागिता रहनु उत्साहको कुरा भएको बताए ।
उनले खेलकुद क्षेत्रमा लगानी गर्न गाउँपालिका प्रतिबद्ध भएको बताए । खेलले भाइचार बढाउने बताउँदै उनले सबैको आफ्नो क्षमता र खेल कौशल प्रदर्शन गर्ने महत्वपूर्ण अवसर भएको र खेलाडीको खेल कौशललाई थप निखार्दै विभिन्न प्रतियोगितामा पालिकाको तर्फबाट राम्रो प्रदर्शन गर्न सघाउ पुग्ने विश्वाससमेत व्यक्त गरे ।
गाउँपालिका उपाध्यक्ष तारा राना तिमल्सिनाले उत्साहपूर्वक खेल क्षेत्रमा लागेका खेलाडीले निराश हुनु नपर्ने बताउँदै प्रतियोगिता सम्पन्न तुल्याउन भूमिका निर्वाह गर्ने सबैलाई धन्यवाद दिए ।
समापन कार्यक्रमको सभाध्यक्षता बेथानचोक गाउँपालिका खेलकुद शाखा प्रमुख सिताराम तिमल्सिनाले गरेका थिए । समापन कार्यक्रमा मण्डनदेउपुर नगरपालिकाका उपप्रमुख विष्णुमणि नेपाल, बेथानचोक गाउँपालिकाका वडा अध्यक्षहरु मधुसुधन तिमल्सिना, पुरुषोत्तम तिमल्सिना, राजकुमार वाइबा लगायतका जनप्रतिनिधिहरुको उपस्थिति रहेको थियो ।
