काठमाडौँ । नेपाली कांग्रेसकी सांसद कुसुमदेवी थापाले अपाङ्गता भएका व्यक्तिहरुको माग तत्काल सम्बोधन गर्न सरकारसँग माग गरेकी छिन् ।
प्रतिनिधि सभाको बिहीबारको बैठकको शून्य समयमा बोल्दै सांसद थापाले संविधानलेसमेत पूर्ण अशक्त र अति अशक्त अपाङ्गता भएकाहरुको सहयोगी सेवा उपलब्ध गराउने व्यवस्था भए बमोजिक तत्काल उक्त व्यवस्था गर्न माग गरेकी हुन् ।
उनले पूर्ण अपाङ्गता भएकाहरुसँग गत चैत १४ गते गरेको सहमति पूर्ण कार्यान्वयनका लागि पनि सभामुखमार्फत सरकारको ध्यानाकर्षण गराएकी छिन् ।
सो क्रममा उनले ३८ दिनदेखि अनसनरत दीपक भण्डारी, प्रेम बुढाथोकी र रामबहादुर तामाङ जीवनमरणको दोषाँधमा रहेको भन्दै तत्काल माग सम्बोधन गरी बाँच्न पाउने अधिकारको सुनिश्चितता गर्न पनि माग गरेकी छिन् ।
यसो भनिन् सांसद थापाले–
‘नेपालको संविधान २०७२ अपाङ्गता भएका व्यक्तिको अधिकार सम्बन्धी ऐन २०७४ को धारा ९ र अपाङ्गता भएका व्यक्तिको अधिकार सम्बन्धी नियमावली २०७७ को परिच्छेद ३ (९) मा व्यवस्था गरेको पूर्ण अशक्त र अति अशक्त अपाङ्गता भएका व्यक्तिलाई सहयोगी सेवा उपलब्ध गराउने स्पष्ट व्यवस्था छ । अपाङ्गता भएका व्यक्तिको अधिकार सम्बन्धी संयुक्त राष्ट्र संघको संघीय महासन्धिको नेपाल पनि पक्ष राष्ट्र भएको नाताले महासन्धीको धारा १९ मा व्यवस्था भए बमोजिमको अधिकारका लागि र चैत १४ मा महिला बालबालिका तथा ज्येष्ठ नागरिक मन्त्रालयमा भएको सम्झौता लागू गर्न विगत ३८ दिनदेखि अनसनमा बसेका दीपक भण्डारी, प्रेम बुढाथोकी र रामबहादुर तामाङ जीवनमरणको दोषाँधको अवस्थामा छन् । उनीहरुको मागलाई तत्काल सम्बोधन गरी पूर्ण अशक्त अपाङ्गता भएका व्यक्तिहरुको स्वाभीमानपूर्वक आफ्नै समाजमा सम्मानपूर्वक जीवनयापन गर्ने अधिकार सुनिश्चित गरियोस् भनी सभामुखमार्फत नेपाल सरकारको ध्यानाकर्षण गराउन चाहन्छु ।’