काठमाडौँ । नेपाली कांग्रेसका महामन्त्री गगनकुमार थापाबारे सामाजिक सञ्जालमा अफवाह फैलाएको पाइएको छ । सामाजिक सञ्जालमा थापामाथि उनी स्वास्थ्य मन्त्री हुँदा उपकरण खरिद तथा अन्य काममा करोडौँ रकम अनियमितता भएको भन्दै अख्तियारमा जाहेरी दर्ता भएको अफवाह फैलाइएको छ ।
गत जेठ २७ गते उजुरी दर्ता भएको भन्दै दर्ता नम्बरसमेत दिइएको छ । तर अख्तियारले भने जेठ २७ गतेदेखि अहिलेसम्म गगन थापाविरुद्ध कुनै पनि उजुरी नपरेको जनाएको छ ।
गगन थापा त्यस्ता नेता हुन् जसले संसदमा पटक पटक २०४८ सालयता उच्च पदमा पुगेका सबैको सम्पत्ति छानबिन गर्न भनिरहेका छन् । भ्रष्टाचारको विरोध गर्दै आइरहेका उनीमाथि दबाब बढाउन पनि यस्तो स्टाटस लेखिएको हुन सक्ने आँकलन गरिएको छ ।
पछिल्लो समय गगनसहित उनको पार्टीले सहकारी प्रकरणमा गृहमन्त्री रवि लामिछानेमाथि छानबिन हुनुपर्ने अडान राखेकै कारण छानबिन समिति बनेको छ भने गिरीबन्धु टि–स्टेट प्रकरणमा केपी शर्मा ओली नेतृत्वको सरकारका पालामा नीतिगत भ्रष्टाचार भएको भन्दै छानबिनको माग गरिएको छ ।
कानूनी झमेलामा पर्ने भएसँगै धेरैले अहिले धमाधम स्टाटस हटाउन थालेका छन् ।
यस्तो छ सामाजिक सञ्जालमा फैलाइएको अफवाह– 'तत्कालीन स्वास्थ्य मन्त्री गगन थापाले मन्त्रालयको विभिन्न स्वास्थ्य उपकरण खरिद र अन्य काममा करोडौँ रकम अनियमितता गरेको भन्दै कारबाही गर्न अख्तियार दुरूपयोग अनुसन्धान आयोगमा जाहेरी दर्ता भएको छ। उजुरी दर्ता नं C-077580/2081-02/27.'
