निजीले बिक्री रोक्दा सरकारी पेट्रोल पम्पमा भीड, उपत्यकामा अभाव [२८ तस्बिरमा]

हाम्रा कुरा

प्रकाशित २०८१ असार ३ सोमबार

काठमाडौँ । पेट्रोलियम ढुवानी मजदुरहरुले आइतबारबाट विभिन्न माग राख्दै शुरु गरेको आन्दोलनपछि निजी पेट्रोल पम्पहरुले पेट्रोलियम पदार्थ बिक्री वितरण रोक गरेसँगै सरकारी पम्पमा पेट्रोल भर्नेको लाइन लागेको छ।

नेपाल आयल निगमका अनुसार शनिबारदेखि नै ट्यांकर चालकहरूले विभिन्न माग राखेर आन्दोलन गरिरहेका छन्। यसै कारण पेट्रोलियम पदार्थ अभाव देखिएको हो।

चालकहरूले पेट्रोलियम पदार्थ बोक्ने ट्यांकर नचलाएका कारण पेट्रोलियम पदार्थ पम्पहरूसम्म पुग्न सकेको छैन।

थानकोटबाट आउने पेट्रोल ट्यांकर व्यवसायीहरूले रोकेसँगै उपत्यकामा पेट्रोलको अभाव भएको हो।

आफूहरूले लामो समयदेखि अत्यावश्यक सेवासुविधा बिनै नेपाल आयल निगममा काम गरेको भन्दै उनीहरूले असन्तुष्टि जनाएका छन्।

संघले एक विज्ञप्ति जारी गर्दै कालोपट्टि बाँधेर, आइतबार गाडीमा कालो झन्डा राखेर र सोमबार पूर्ण रूपमा काम छाडेर ट्यांकरको साँचो नै सवारीधनीलाई हस्तान्तरण गरेर विरोध गर्ने जनाएको थियो ।