काठमाडौँ । फ्रान्सका पूर्वराष्ट्रप्रमुख फ्राँस्वाँ ओलन्दले मध्यावधि निर्वाचनले अति दक्षिणपन्थीलाई ठूलो लाभ दिनसक्ने बताएका छन् ।
मध्य फ्रान्समा रहेको आफ्नो जन्मथलो कोरेज विभागमा चुनावी अभियानका क्रममा ओलन्दले भने, “मसँग मिल्नका लागि कुनै आधार छैन । यो सबै विगतले बताउँछ । ।”
सन् २०१७ को चुनावमा समाजवादी ओलन्द दोस्रो कार्यकालका लागि उम्मेदवार बनेका थिएनन् ।
व्यापारसमर्थक मध्यमार्गीका रूपमा दौडिरहेका उनका पूर्व अर्थमन्त्री म्याक्रोनले आश्चर्यजनक जित हासिल गरेपछि यसले बायाँ र दायाँका परम्परागत पार्टीहरूलाई चकित बनाएको थियो ।
उनले भने, “‘युवा व्यक्ति (म्याक्रोन)’ को दोस्रो कार्यकालको दुई वर्ष मात्रमा नै ‘यदि म्याक्रोनिज्म वास्तवमा कहिल्यै अस्तित्वमा थियो भने’ यो अब समाप्त भएको छ । म यो कुनै विशेष शत्रुताको साथ भनिरहेको छैन ।”
“मेरो मतलब यो होइन कि उनको राष्ट्रपतिको कार्यकाल समाप्त हुँदैछ, यो फरक कुरा हो तर उनले केही समयका लागि जे प्रतिनिधित्व गरेका थिए त्यो सकिएको छ,” पूर्वराष्ट्रपति ओलन्दले भने ।
सन् २०२२ मा दोस्रो पटक पाँच वर्षे कार्यकालका लागि पुनः निर्वाचित भएका म्याक्रोनले सोही वर्ष भएको विधायिकी निर्वाचनमा संसद्मा आफ्नो पूर्ण बहुमत गुमाएका थिए ।
पेन्सनको उमेर बढाउने र अध्यागमन कानूनलाई कडा बनाउनेजस्ता कडा र विवादास्पद सुधारहरू पारित गरेको म्याक्रोनको पार्टी अल्पमतको सरकारमा परिणत भएको छ ।
जुन ९ मा सम्पन्न युरोपेली संसदको चुनावमा भारी पराजय भोगेपछि म्याक्रोनले गतिरोध तोड्ने आशामा संसद विघटन गरेका थिए ।
जुन ३० र जुलाई ७ मा नयाँ निर्वाचन हुनेछ र यसमा अति दक्षिणपन्थी नेसनल र्याली (आरएन) ले सबैभन्दा बढी सिट जित्ने अपेक्षा गरिएको छ ।
फ्रान्सको दुई चरणको निर्वाचन प्रणालीले नतिजाको पूर्वानुमान गर्न कठिन बनाएको छ, तर म्याक्रोनको मध्यावधि निर्वाचन घोषणा गर्ने निर्णयलाई फ्रान्समा विश्लेषकहरूले ‘राजनीतिक जुवा’ को संज्ञा दिँदै उनले नयाँ बहुमत प्राप्त गरेर प्रतिफल दिने सम्भावना कम रहेको बताएका छन् ।
विश्लेषकहरूले निर्वाचनको सट्टा उनले वैचारिक प्रतिद्वन्द्वीलाई सरकार चलाउन दिएर नेतृत्व गर्नु उत्तम विकल्प रहेको तर यो अब वितिसकेको बताएका छन् ।
म्याक्रोनको शासनले ठूलो राजनीतिक मूल्य चुकाउनुपरेको ओलन्दले बताए ।
उनले भने, “ती पक्षहरूले ठूलो राजनीतिक क्षति ब्यहोरेका छन् भने जनताको मनोबल पनि गिरेको छ । चरम दक्षिणपन्थीहरू यति बलियो कहिल्यै भएका थिएनन् ।”
“यो राजनीतिक पुनर्संरचनाको समय हो,” ओलन्दले भने ।
ओलन्दको सोसलिस्ट पार्टीले ग्रिन्स, कम्युनिस्ट र हार्ड लेफ्ट फ्रान्स अनबोड (एलएफआई) लगायत अन्य वामपन्थी पार्टीहरूसँग चुनावी गठबन्धन बनाएको छ ।
उनीहरूको न्यू पपुलर फ्रन्ट (एनएफपी) हाल चुनावमा आरएनपछि दोस्रो स्थानमा छ, दुबै म्याक्रोनको रिनासा (पुनर्जागरण) गठबन्धन समूहभन्दा धेरै अगाडि देखिएका छन् ।
