कसैले त
बुझोस् न मलाई पनि
आफ्नै जस्तै गरी
कसैले त सम्झोस् न
म नबोली कनै
मेरा अनुहार हेरेरै
भनोस्
के भएको छ तिमीलाई ?
किन निराश छौ ?
म झुटो मुस्कान
ओठसम्म ल्याइ
भन्न सकूँ
होइन होइन
मलाई केही भएको छैन
सब ठीक छ
ऊ जिद्दी गरोस्
कारण सोधोस्
मलाई सम्झाओस्
दुःखी नहोऊ
चिन्ता नलेऊ
म छु
सब ठीक हुन्छ भनोस्
मेरो हरेक सफलताको
कारण ऊ बनोस्
मेरा हरेक मुस्कानको
पछि ऊ होस्
मेरा कमजोरीलाई
सही बाटोमा ल्याउने ऊ होस्
जसलाई म
मेरा हरेक कुराहरु
बिना झुट
बोली बताउन सकूँ
म आफूलाई भन्दा उसलाई विश्वास गरूँ
उ मेरो भरोसाको मजबुत खाबो होस्
जसको विश्वास थाँती राख्न पनि म
हरदम कोसिस गरिरहूँ
मेरा हरेक सुख दुःखको साक्षी ऊ होस्
उसलाई भेटेपछि मेरो जीवनको
हरेक प्रश्नको उत्तर भेटूँ ।