काठमाडौँ । पोर्चुगल जर्मनीमा जारी युरोकप फुटबलको क्वार्टरफाइनलमा पुगेको छ । गएराति सम्पन्न खेलमा स्लोभेनियालाई पेनाल्टी सुटआउटमा पराजित गर्दै पोर्चुगल प्रतियोगिताको क्वार्टरफाइनलमा पुगेको हो ।
निर्धारित ९० मिनेटको खेल गोलरहित बराबरी भएपछि खेल ३० मिनेटको अतिरिक्त समयमा पनि गोलरहित भएपछि खेलको निर्णय पेनाल्टी सुटआउटबाट भएको थियो ।
अतिरिक्त समयको १०५ औँ मिनेटमा पोर्चुगलले पाएको पेनाल्टी क्रिस्टियानो रोनाल्डोले मिस गरेका थिए ।
रोनाल्डोले हानेको पेनाल्टी स्लोभेनियाका गोलकिपरले बचाएका थिए । पेनाल्टी मिस गरेका रोनाल्डो मैदानमै रोएको दृश्य भावुक देखिएको थियो ।
आफ्नो क्यारियरको अन्त्यतिर रहेका रोनाल्डोलाई अन्य खेलाडीले सम्झाइरहेको दृश्य देखिएको थियो ।
थपिएको ३० मिनेटमा पनि कुनै गोल नभएपछि खेलको निर्णय पेनाल्टी सुटआउटबाट भएको थियो । पेनाल्टी सुटआउटमा पोर्चुगलको जितका नायक गोलकिपर डिओगो कोस्टा बनेका थिए । उनले स्लोभेनियाका तीनै पेनाल्टी बचाएर पोर्चुगललाई जिताएका थिए ।
अब क्वार्टरफाइनलमा पोर्चुगलले फ्रान्सको सामना गर्ने भएको छ । फ्रान्सले बेल्जियमलाई हराएर क्वार्टरफाइनलको यात्रा तय गरेको हो ।
पोर्चुगल र फ्रान्सबीचको क्वार्टरफाइनल खेल जुलाई ५ मा हुनेछ ।
त्यस्तै हारसँगै स्लोभेनियाको युरोकप यात्रा समाप्त भएको छ ।
