आयुक्त सुमित्राको घर कम्पाउण्डमा डोजर चलेपछि चिरिबाबुलाई अख्तियारले काट्यो पत्र
हाम्रा कुरा
प्रकाशित २०८१ असार २० बिहिबार
627
Shares
तस्बिर – फाइल ।
काठमाडौँ । ललितपुर महानगरपालिकाका मेयर चिरिबाबु महर्जनलाई अख्तियार दुरुपयोग अनुसन्धान आयोगले पत्र काटेको छ । बुधबार अख्तियारकी आयुक्त डा. सुमित्रा अमात्यको घरको पर्खाल भत्काएपछि अख्तियारले चिरिबाबुलाई पत्र काटेको हो ।
अहिले काटिएको पत्रसँग भने पर्खाल भत्काइएको विषयसँग सम्बन्धित छैन । बाढीपहिरो पीडितका नाममा महानगरलाई हानि हुने गरी रकम बाँडेको उजुरी परेपछि सोधपुछका लागि बोलाइएको अख्तियारले जनाएको छ ।
उजुरीमा २०७७ सालमा धापाखेलमा बाढीपहिरो पीडितलाई साढे एक लाख र साढे दुई लाखका दरले कार्यपालिकाको निर्णय विपरीत रकम बाँडेको आरोप छ ।
तर पत्र भने आयुक्तको पर्खाल भत्काएको दिनमा काटिएको छ । मन्दिरको जग्गा मिचेको भन्दै महानगरपालिकाले अमात्यको घरको पर्खाल भत्काएको हो ।
ललितपुर महानगरपालिका–१० चाकुपाटस्थित अमात्यको घरको कम्पाउण्ड (पर्खाल) बुधबार दिउँसो महानगरपालिकाको टोलीले डोजर लगाएर भत्काएको थियो ।
डा. सुमित्रा अमात्य र डा. दिवस अमात्य दम्पतीले १ असोज २०७८ मा १५ आना ३ पैसा क्षेत्रफल रहेको घरजग्गा किनेको महानगरपालिकामा पेस भएको कागजातबाट देखिन्छ ।
घरजग्गा खरिद गरेपछि उनीहरूले पर्खाल बनाएका थिए । त्यस क्रममा मन्दिर र सम्पदाको जग्गा मिचिएको स्थानीयहरूको आरोप छ ।
स्थानीयले मन्दिरको जग्गा मिचेको भन्दै ललितपुर महानगरपालिकामा उजुरी दिनुका साथै अतिक्रमण हटाउन माग गर्दै आएका थिए ।
