-
-
-
-
काठमाडौँ । नेपाली कांग्रेसको केन्द्रीय कार्यसम्पादन समितिको बैठक दिउँसो बस्ने भएको छ । बैठक दिउँसो २ बजे पार्टी मुख्यालय बीपीनगर सानेपामा बस्ने भएको छ ।
बैठकमा आइतबार गठन हुने नयाँ सरकारमा पार्टीबाट पठाउने मन्त्रीहरुको बारेमा छलफल हुने जनाइएको छ ।
सभापति शेरबहादुर देउवा, महामन्त्री गगनकुमार थापा लगायतले बसेर एउटा खाका बनाइरहेको बुझिन्छ ।
सोही खाकाअनुसार पार्टीबाट समावेशी आधारमा सरकारमा सहभागीता जनाउने बताइएको छ ।
रमेश लेखक गृह र आरजू राणा देउवा परराष्ट्र मन्त्री भएर सरकारमा जाने लगभग तय रहेको छ ।
अन्यबारे छलफल जारी रहेको बताइएको छ । देउवाले यसपालि पार्टीको नेतृत्व गरेर जान महामन्त्री गगनकुमार थापालाई आग्रह गरेको भए पनि थापाले भने पार्टीका कामहरु बाँकी रहेकाले सरकारमा नजाने बताइसकेका छन् ।
कांग्रेस र एमालेको सहकार्यअनुसार प्रधानमन्त्रीमा एमाले अध्यक्ष केपी शर्मा ओलीले राष्ट्रपति समक्ष दाबी पेश गरिसकेका छन् ।
उनको आइतबार बिहान नियुक्ति हुनेछ भने दिउँसो शपथ ग्रहण हुनेछ ।
