काठमाडौँ । नेकपा एकीकृत समाजवादी (एस) ले महाधिवेशनपछि पहिलो पटक केन्द्रीय कमिटीको बैठक राखेको छ । पार्टीभित्र देखिएको असन्तुलनलाई मिलाउनका लागि र समसामयिक राजनीतिक विषयमा छलफल गर्न लागि यो बैठक राखिएको छ । 

साथै पार्टीको तर्फबाट सांसद बनेका व्यक्तिहरुमा आएको विचलनबारे छलफल गर्नका लागि केन्द्रीय कमिटीको बैठक आयोजना गरिएको बताइए पनि सांसदहरुलाई फकाउने र थर्काउने कामचाहिँ पार्टीको हाइकमाण्डबाट गरिने बताइएको छ ।

पाटीभित्रबाटै अलि टाढा रहेका प्रेम आले, किसान श्रेष्ठ, धनबहादुर बूढाको अवस्थाबारे नेता कार्यकर्ता जानकार रहेका भए पनि उनीहरुलाई सांसदकै रुपमा कसरी टिकाउने भन्ने विषयमा पार्टीका नेताहरुले केही बताएका छैनन् ।  

पछिल्लो समय प्रेम आले र किसान श्रेष्ठले पाटी छाड्न लागेको हल्ला पार्टीभित्रै छ । उनीहरु सांसद नभएको भए र कानूनी अड्चन नभएको भए यसअघि नै एमालेमा फर्किसक्ने थिए । तर अहिले एक पार्टीको सांसद अर्को पार्टी प्रवेश गर्दा सांसद पद नै जाने भएकाले अलमलमा परेर बसेका छन् ।

एसभित्र चलेको चर्चाअनुसार आले पार्टी छोड्ने अन्तिम तयारीमा छन् । आलेसँग सांसद धनबहादुर बूढा पनि पार्टी छोड्ने सुरसारमा छन् । एस छोडेर एमालेमा फर्किने उनीहरूको तयारी छ । 

स्रोतका अनुसार आलेले एमाले अध्यक्ष केपी शर्मा ओलीसँग पटकपटक छलफल गरेको भए पनि उनीहरु पार्टी प्रवेश गरिहाल्ने अवस्थामा पुगिसकेका छैनन् । 

गत असारको एसको महाधिवेशन बहिष्कार गरेर तीर्थाटन पुगेका आलेलाई पार्टीले कारबाही स्वरुप केन्द्रीय सदस्यबाटै हटाइसकेको छ ।

‘आलेले गल्ती महसुस गरेमात्रै उनी केन्द्रीय सदस्य हुन सक्छन् नत्र उनलाई कुनै जिम्मेवारी दिइने छैन’, एसका एक उच्च नेताले भने ।

आले नयाँ गठबन्धनसँगै एस छोड्ने तयारीमा थिए । त्यसबेलामा ओलीसँग आलेले लामो छलफल भएको थियो ।

छलफलमा धनबहादुर बूढा पनि सहभागी थिए । किसान श्रेष्ठले त मधेस प्रदेशको एक कार्यक्रममा केपी ओलीको अन्त्यन्त ठूलो प्रशंसा नै गरेका थिए । 

महाधिवेशन अवधिमा धनबहादुर बूढा पनि देखिएनन् । नेताहरूका अनुसार त्यतिबेला सहरी विकासमन्त्रीसमेत रहेका बूढाले महाधिवेशनका लागि आर्थिक सहयोग पनि गरेका थिएनन् । 

अध्यक्ष माधवकुमार नेपालले महसुस गर्ने गरी दुवै सांसदले पार्टीलाई बहिष्कार गरेका थिए भने पार्टीको महाधिवेशनमा उपस्थित भएका श्रेष्ठले पनि पार्टी पद्धतिको खुलेर विरोध गरेका थिए ।

‘प्रेम आले महाधिवेशनमा उपस्थित हुनुभएको थिएन, त्यसकारण उहाँ केन्द्रीय सदस्य बन्नु भएन, अब के हुन्छ पार्टीले छलफल गर्ला’, नेकपा एसका निवर्तमान प्रचार विभाग प्रमुख जगन्नाथ खतिवडाले भने ।

गत आइतबार प्रधानमन्त्री केपी ओलीले विश्वासको मत दिने वा नदिने विषयमा छलफपल गर्न बोलाइएको एसको संसदीय दलको बैठकमा पनि आले अनुपस्थित भएका थिए ।

तर विश्वासको मत दिने दिन संसदमा आले उपस्थित भएका थिए । उनले ओलीको विपक्षीमा मतदान गरेका थिए । 

आलेले पार्टी विभाजन गराउन भने नसक्ने भएकोले उनी एक्लै एमालेमा जाने संभावना कम रहेको छ । 

आलेसँगै अन्य सांसद पनि जोडिए भनेचाहिँ ओलीले पार्टी विभाजनमा सहजीकरण गर्नसक्ने संभावना रहेको स्रोतको दाबी छ । 

एस राष्ट्रिय पार्टी नभएकोले उक्त पार्टीका सांसदको भूमिका स्वतन्त्र हुने कानूनी व्याख्या हुने गरी निर्वाचन आयोगले सहजीकरण गरिदिन सक्ने बताइन्छ । 

आले मात्र होइन एसका सांसद भानुभक्त जोशी, अम्मरबहादुर थापा, कृष्णकुमार श्रेष्ठ, शेरबहादुर कुँवरलगायतका सांसद पनि असन्तुष्ट रहेका छन् । 

उनीहरु सबैले माधव नेपाललाई छाड्ने परिस्थिति बनेमा ओलीले सहजीकरण गर्ने स्रोतको दाबी छ ।