माथि चढ्दा
सुरेली खेल्दै
तल झर्दैछु
म सारै अन्योलमा छु
कसलाई सोधुँ
खै अब म के गर्दैछु ?
अव्यक्त हृदयको भावनासित
भलाकुसारी गर्दै
तलमाथि गर्दैछु
म छक्क पर्दै छु
यो अन्योलमा म हराउँदै छु ।
वीर पुर्खाको राष्ट्र नेपाल
अहिले सामाजिक विकृतिले थिचिएको छ
प्रतिष्ठाको चम्किलो ज्योति
अब उडान लिने समस्याहरूले
धमिलिएको छ
यसै अलमल्ल हुँदै
दोधारमा छु
कसलाई सोधुँ
खै म के गर्दैछु ?
आशा र गर्वले भरिएकी नारी
आज ज्यान जोगाउन
संघर्ष गर्छिन्
विद्यालय पठाउन छोरी
कम्पीत मन
नफर्किएसम्म
समालिन्छ भन्न सक्दिन
यो कुसंस्कार देखेर
छट्पटिएको म
आक्रोशित भावमा
समालिँदै चुप छु
कसलाई सोधुँ
खै म के गर्दैछु ?
भविष्य देखाउनेहरू भनौँ
इतिहासका सारथीहरू
अब शरद्का
पुराना पातहरू जस्तै ओइलाएका छन्
लगामको कमान पाएका
बज्रस्वाँठका जुधाइले
राष्ट्र र राष्ट्रियता
मौन भएको बेला
उद्दारको चित्कार गुहारमा गुन्जिँदा
होश गुमाएको पथिक जस्तो
न्यास्रो मनसँग धम्म बस्दै
दुःखको बोझले थुनिएर
विलम्व पो गर्दैछु
कसलाई सोधुँ
खै अब म के गर्दैछु ?
कठोर यथार्थको
सामना गर्न
बाध्य भएको छु
पोका भित्रको
अटस मटस बारुद जस्तै
घाममा सेकिन
तयार भएको छु
छोप्ने हातको पर्खाइमा
नेतृत्व लिन तयार भएको छु ।
