समितिको प्रतिवेदन दश दिनभित्र राष्ट्रिय सभामा पेश गरिने
हाम्रा कुरा
प्रकाशित २०८१ भदौ १२ बुधबार
1.1k
Shares
काठमाडौँ । सङ्घीय संसद् राष्ट्रिय सभाको सार्वजनिक नीति तथा प्रत्यायोजित विधायन समितिले आउँदो १० दिनभित्र आफ्नो पाँचौँ वार्षिक प्रतिवेदन सभामा पेश गर्ने भएको छ ।
सिंहदरबारमा मंगलबार बसेको समितिको बैठकले आगामी १० दिनभित्रमा संश्लेषणसहित प्रतिवेदन राष्ट्रिय सभा सचिवालयमा पेश गर्ने निर्णय भएको सभापति मायाप्रसाद शर्माले जानकारी दिए । सचिवालयले पेश गरेको प्रतिवेदनको प्रारम्भिक मस्यौदामाथि छलफल सुरु भएको हो ।
बैठकमा सभापति शर्माले प्रतिवेदन संश्लेषण गरेर लैजाने विषयमा जानकारी गराउँदै सदस्यहरूसँग सुझाव माग्नुभएको छ । उक्त प्रतिवेदनमा समितिले हालसम्म गरेका गतिविधि समावेश छन् ।
बैठकमा समितिका सदस्यहरू नेपाली कांग्रेसका सांसद गोपालकुमार बस्नेत, युवराज शर्मा, पदम परियार, नेपाल कम्युनिष्ट पार्टी (एमाले)का सांसद गोपाल भट्टराई, रुक्मिणी कोइराला, नेपाल कम्युनिष्ट पार्टी (एकीकृत समाजवादी)की सांसद गोमादेवी तिमिल्सिना, मदनकुमारी शाह, नेपाल कम्युनिष्ट पार्टी (माओवादी केन्द्र)की रेनु चन्द र श्रीकृष्णप्रसाद अधिकारीले धारणा राख्नुभएको थियो ।
