पहिरोमा ज्यान गुमाएका फुटबल खेलाडीहरुको पशुपतिमा अन्तिम संस्कार [तस्बिर]

हाम्रा कुरा

प्रकाशित २०८१ असोज १४ सोमबार

काठमाडौँ । पहिरोमा परी ज्यान गुमाएका फुटबलख खेलाडीहरुको दाहसंस्कार गरिएको छ । उनीहरुको सोमबार दिउँसो पशुपतिमा अन्तिम संस्कार गरिएको हो ।

युवा तथा खेलकुद मन्त्री तेजुलाल चौधरीले नेपालको झण्डा तथा अखिल नेपाल फुटबल संघ एन्फाका अध्यक्ष पंकजविक्रम नेम्वाङले एन्फाको झण्डा ओढाएर श्रद्धाञ्जली अर्पण गरेका थिय।

अविरल वर्षाका कारण मकवानपुरको इन्द्रसरोवर गाउँपालिका ३ स्थित श्री वात्सल्य देवी उचच माविको प्रशिक्षण केन्द्रबाट सुरक्षित स्थानतर्फ जाँदै गर्दा पहिरोमा परी छ युवा खेलाडीको निधन भएको थियो ।

उक्त पहिरोमा परी दिवस बानियाँ, प्रियंस आचार्य, अनुपम घलान, साइमन योञ्जन, विकल रेग्मी र आदिल्य बलम्पाखीको निधन भएको हो ।

घलान, योञ्जन र रेग्मीको पार्थिव शरीर हेलिकप्टरमार्फत गृहजिल्ला मकवानपुर पठाइएको छ भने बलम्पाखीको सर्लाही पठाइएको छ । बानियाँ र आचार्यको पशुपतिमा अन्त्येष्टि गरिएको हो ।

पशुपतिमा फुटबल प्रेमीहरुको बाक्लो उपस्थिति रहेको थियो ।