शुरु भयो दशैँ, राखियो जमरा, शक्तिपीठहरुमा दर्शनार्थीको घुइँचो [फोटोफिचर]
हाम्रा कुरा
प्रकाशित २०८१ असोज १७ बिहिबार
205
Shares
काठमाडौँ । प्रत्येक वर्ष आश्विन शुक्ल प्रतिपदादेखि पूर्णिमासम्म मनाइने हिन्दूहरुको महान् पर्व बडादशैँ आजबाट शुरू भएको छ । आज घरघरमा वैदिक विधिपूर्वक दियो, कलश र गणेश स्थापना गरी घटस्थापना गरिएको छ ।
बिहानै नृत्य कर्म समाप्त गरी नजिकको नदी वा चोखो स्थलबाट बालुवा, माटो ल्याई गाईको गोबरले लिपपोत गरिएको पूजा कोठा वा दशैँ घरमा विधिपूपर्वक जौ, मकैको जमरा राख्ने गरिन्छ ।
आजैदेखि दशैँ घरमा शक्तिकी अधिष्ठात्री देवी दुर्गाको आवाहन गरी पूजा आरम्भ हुन्छ ।
जौको अङ्कुर दुर्गा देवीको प्रिय वस्तु भएकाले आज यो रोपण गरी दुर्गालाई चढाएर विजया दशमीको दिन टीका प्रसादसितै समृद्धिको प्रतीक पहेँलो जमरा ग्रहण गरिन्छ ।
आजकै दिन हनुमानढोका दरबार स्क्वायरको दशैं घरमा पनि विधिवत् रुपमा जमरा राखिएको छ ।
आज सर्वसाधारणदेखि राष्ट्रपतिसम्मले जमरा राखेका हुन् । बिहान ९ः१६ बजेको शुभ साइतमा जमरा राखिएको हो ।
आजैदेखि देशका सबैजसो भागका शक्तिपीठहरुमा दर्शनार्थीको भीड बढेको छ ।
