खसीबोका खाद्य संस्थानमा, आइतबारदेखि बिक्री [फोटोफिचर]
हाम्रा कुरा
प्रकाशित २०८१ असोज १९ शनिबार
154
Shares
काठमाडौँ । नेपालीहरूको सबैभन्दा ठूलो पर्व दशैँ लागेसँगै काठमाडौँका बजारहरूमा व्यापार व्यवसायको चहलपहल तीव्र छ । दशैँमा नयाँ नयाँ कपडा, दशैँका लागि आवश्यक सामग्री, मासुका लागि खसी, बोका, च्याङ्ग्रा, भेँडालगायत खाद्यान्न र अन्य अत्यावश्यक सामग्रीहरू किनमेल गर्नेहरूको भीड बजारमा देख्न सकिन्छ ।
विपद्का कारण विगतको तुलनामा यस वर्ष केही कमी देखिए पनि दशैँको लागि तयारी तीव्र छ । सहरहरुबाट गाउँ फर्किने र कामको सिलसिलामा बाहिर रहेका नेपालीहरू स्वदेशमा फर्किने क्रम पनि बढिरहेको छ ।
त्यसैले पनि बजार चलायमान बन्दै गएको छ । विपद्का कारण दशैँमा खसी, बोकाहरू कमी हुने हो की भन्ने चिन्ता आम सर्वसाधारणमा रहेको छ । तर कलङ्की खसी बजार व्यवस्थापन समिति भने काठमाडौँ उपत्यकामा विगत झैँ यस वर्ष पनि मासुको कमी हुन नदिने र आपूर्ति पुर्याउने बताउँछ ।
कलङ्की खसी बजार व्यवस्थापन समितिका व्यवस्थापक जीवनराज खतिवडाले समिति बनाइ खसी बिक्री वितरण गरेको ३१ वर्षसम्म काठमाडौँ उपत्यकाको माग पूरा गरिरहेको र यस वर्ष पनि आपूर्ति पूरा गर्ने बताए ।
उनले यस वर्ष विपद्का कारण सडकहरूको अवस्था केही कठिन भए पनि पश्चिमबाट खसी, बोका र च्याङ्ग्राहरू ल्याउने काम भइरहेको बताए । उनले काठमाडौंमा मासुको व्यवस्थापन गर्न ३५–४० जिल्लाबाट खसी, बोका, च्याङ्ग्रा भित्र्याउने काम भइरहेको बताए ।
यसैबीच खसी बोका खाद्य संस्थानको कार्यालय थापाथलीमा ल्याइएको छ । खाद्य व्यवस्था तथा व्यापारले आइतबारदेखि खसी बोका र च्याङ्ग्रा बिक्री गर्दैछ ।
