काठमाडौँ । राष्ट्रपति रामचन्द्र पौडेलले हिन्दूहरुको महान् चाड विजयादशमीका अवसरमा राष्ट्रपति कार्यालय शीतल निवासमा प्रधानमन्त्रीदेखि जनसाधारणलाई टीका र जमरा प्रदान गरेका छन् ।
आफूले बिहान ११ः३६ बजेको शुभ साइतमा टीका लगाएपछि आफन्तलाईलाई टीका लगाइदिएर राष्ट्रपति पौडेलले दिउँसो ३ बजे प्रधानमन्त्री केपी शर्मा ओली, उपप्रधानमन्त्रीद्वय, मन्त्री, सांसद, संवैधानिक अङ्गका प्रमुख एवं सदस्यलाई नवदुर्गाको प्रसादस्वरुप टीका र जमरा प्रदान गरिसकेपछि इच्छुक जनसाधारणलाई पनि टीका लगाइदिएका हुन् ।
राष्ट्रपतिको हातबाट टीका र जमरा ग्रहण गर्ने इच्छा राखेर लाममा बस्ने सबैलाई राष्ट्रपति पौडेलले टीका लगाइदिएका छन् । राष्ट्रपतिबाट टीका र जमरा ग्रहण गर्न सयौँ मानिस लाममा बसेका थिए ।
विजयादशमीका दिन राष्ट्रको अभिभावकका रुपमा राष्ट्राध्यक्षबाट हजारौँ नेपालीले टीका र प्रसाद ग्रहण गर्ने गरेका छन् । राजतन्त्रकालमा राजाले निरन्तरता दिएको यो परम्परालाई सङ्घीय लोकतान्त्रिक गणतन्त्र स्थापनापछिका राष्ट्रपतिहरुले पनि निरन्तरता दिँदै आएका छन् ।
उता पूर्वराजाले पनि निर्मल निवासमा जनसाधारणलाई टीका लगाइदिएका छन् ।
