महोत्तरी । बडादशैँको अवसरमा महोत्तरीको जलेश्वर नगरपालिका-२ स्थित दुर्गाचोकमा पूजाका लागि बनाइएको दुर्गा भवानीको मूर्ति आइतबार बरुण सरोवरमा बिसर्जन गरिएको छ ।
दुर्गा भवानीको प्रतिमाका साथै पूजाका लागि निर्माण गरिएको भगवान शिव, गणेश, कात्तिक, मातालक्ष्मी र माता सरस्वतीको प्रतिमालाई बरुण सरोवरमा सेलाइएको पूजा समितिका अध्यक्ष शिवचन्द्र चौधरीले जानकारी दिए ।
दुर्गा चोकबाट छट्टाछुट्टै ट्याक्टरमा राखी सबै मूर्तिलाई बुद्धीजीवीचोक, जिरोमाइल चोक, अस्पतालचोक, साहुजीपट्टी, नगरपालिका चोक, शङ्करचोक हुँदै नगर परिक्रमा गरी बरुण सरोवर पुर्याइ सेलाइएको हो ।
दुर्गा मूर्ति बिसर्जनका क्रममा हुनसक्ने मानवीय क्षतिलाई मध्यनजर गर्दै रणभीम गणका नेपाली सेनाको सहयोगमा पानीमा सेलाइएको अध्यक्ष चौधरीले जानकारी दिए ।
बडादशैँको १० दिनसम्म पूजाअर्चना गरिएको मातादुर्गा भवानीसहित सबै देवी-देवतालाई आइतबार बिहान पुनः पण्डित ललित झा र पूजाकर्ता रामजीवन साहले विशेष पूजाअर्चना गर्दै दुर्गा पूजा बिसर्जन गरेका थिए ।
