काठमाडौँ । सञ्चार तथा सूचना प्रविधिमन्त्री पृथ्वीसुब्बा गुरुङले देशी-विदेशी प्रतिक्रियावादीहरू प्रधानमन्त्री केपी शर्मा ओलीलाई पदबाट हटाउने अभियानमा रहेको टिप्पणी गरेका छन् । देश र जनताका लागि निःश्वार्थ भावका साथ काम गरिरहेको व्यक्ति ओली भए पनि उनलाई देशी, विदेशी प्रतिक्रियावादीहरुले एक्लाउने र पदबाट हटाउने अभियान नै सञ्चालन गरिरहेको मन्त्रीसन्त्री गुरुङको जिकिर थियो । 

उनले ओलीलाई एक्लाउने षड्यन्त्रविरुद्ध प्रतिवाद गर्न पनि एमाले, नेता कार्यकर्तालाई सचेत गराए । उनले ओलीमाथिको आक्रमण सिंगो नेपाल र नेपालीमाथिको आक्रमण भएकाले एमाले नेता, कार्यकर्ताले त्यसको प्रतिवादका लागि फेसबुक, टिकटक जस्ता सामाजिक सञ्जालको अधिक प्रयोग गर्नुपर्ने बताए । एमाले उपमहासचिव समेत रहनुभएका मन्त्रीसन्त्री गुरुङले पार्टीका अध्यक्ष समेत रहनुभएका प्रधानमन्त्री ओलीमाथि ठूलो षड्यन्त्र हुँदा पनि पार्टी पङ्क्ति त्यसको पक्षमा नभिएको भन्दै असन्तुष्टि समेत व्यक्त गरे ।

उनले भने, ‘नयाँ पार्टीहरूले त्यही भाष्य बनाएका छन् । देशी, विदेशीहरूले त्यही भाष्य बनाएका छन् । हामीलाई कसरी एक्लो पारौँ ? भनेका छन् । हामो अध्यक्षलाई कसरी एक्लाउने भनेका छन् ? प्रधानमन्त्रीबाट हटाउने भन्ने अभियानमा छन् । त्यसमा हाम्रा सतर्कता खै ? यो मुलुकका लागि केहीन केही योगदान गरिएको छ । निःस्वार्थ रूपमा देशका लागि काम गरिएको छ । त्यो व्यक्ति केपी ओली नै हो । तर उनी जहाँ जाँदा पनि किन नारा लागि रहेको छ ? त्यसकारण त्यसकारण हामीले किन त्यसको उत्तर दिन सकिरहेका छैनौ ? यति ठूलो षड्यन्त्र छ, त्यो षडयन्त्रको विरुद्धमा बोल्ने कोही छैन । बोल्नुपर्दैन ? लेख्नुपर्दैन टिकटक चलाउेहरु, फेसबुक चलाउनेहरूले ? घिनलाग्दो हर्कत गरिरहेका हुन्छन्, त्यसको प्रतिवाद गर्नुपर्दैन ? कहाँ गयो हाम्रो साइबर सेना ? सबैले त्यो गर्नु प¥यो । त्यो एउटा व्यक्तिमाथिको मात्रै आक्रमण होइन । केपी ओली प्रतिपक्षका नेता भइन्जेल कसैले आक्रमण गरेको थियो ? केपी ओली कमजोर बनाईयो भने एमाले कमजोर बन्छ भन्ने मान्यताका आधारमा मानिसहरूले यो हर्कत गरिरहेका छन् । ओलीमाथिको आक्रमण सिंगो श्रमजीवी जनतामाथिको आक्रमण हो । सिंगो नेपाली जनतामाथिको आक्रमण हो । सिंगो एमालेमाथिको आक्रमण हो । त्यो कुरा हामीले बुझ्नुपर्दछ ।’

मन्त्री गुरुङले सरकारले देश र जनताको हितमा धेरै काम गरेको दाबी समेत गरे । सरकारले आफ्नो सय दिनको कार्यकालमा मुलुक र जनताको अहितमा एउटा पनि काम नगरेको उनले दाबी गरे । मन्त्री गुरुङले नयाँ भनिएका पार्टीहरूले ठूलो पार्टीहरूले केही पनि गरेनन् भनेर गलत भाष्य सृजना गर्न खोजेको उल्लेख गर्दै त्यसका विरुद्ध वैचारिक सङ्घर्ष गर्नुपर्नेमा पनि जोड दिए।