रविलाई भैरहवा ल्याइएपछि रास्वपाको प्रदर्शन [तस्बिर]
हाम्रा कुरा
प्रकाशित २०८१ कार्तिक २७ मंगलबार
974
Shares
भैरहवा । सहकारी ठगी प्रकरणमा अनुसन्धानका क्रममा कास्की प्रहरीको नियन्त्रणमा रहेका राष्ट्रिय स्वतन्त्र पार्टी (रास्वपा) का सभापति एवं पूर्व गृहमन्त्री रवि लामिछानेलाई भैरहवा ल्याइएको छ । उनलाई दिउँसो साढे १२ बजे पोखराबाट विमानमार्फत भैरहवा ल्याइएको हो ।
उनलाई पोखरा अन्तर्राष्ट्रिय विमानस्थलबाट भैरहवास्थित गौतमबुद्ध अन्तर्राष्ट्रिय विमानस्थल ल्याइ जिल्ला प्रहरी कार्यालयमा पुर्याएर सरकारी वकिलको कार्यालय लगी बयान लिइने छ ।
लामिछानेलाई भैरहवा ल्याउने भएपछि रास्वपाका नेता तथा कार्यकर्ताले बिहानैदेखि विमानस्थल बाहिर भेला भएर नाराबाजी गरेका थिए ।
उनीहरु त्यहाँबाट सरकारी वलिकको कार्यालय बाहिर गएर आन्दोलन गर्नेछन् । यसअघि नै सबैलाई बिहान ११ बजे भेला हुन रास्वपाले सर्कुलर जारी गरेको भए पनि अपेक्षाकृत कार्यकर्ताहरु नआएको रास्वपाका एक स्थानीय नेताले बताए ।
यसअघि पोखरा र काठमाडौँमा पनि शुरुका दिनका तुलनामा समर्थकहरु घटेका थिए ।
रास्वपाले प्रदर्शन गर्न थालेपछि ठूलो संख्यामा सुरक्षाकर्मी परिचालन गरिएको छ ।
बुटवलको सुप्रिम बचत तथा ऋण सहकारी संस्थाको ठगी आरोपमा रुपन्देही जिल्ला अदालतबाट पक्राउ पुर्जी जारी भएपछि लामिछानेलाई बयानका लागि आज भैरहवा ल्याइएको हो ।
उनलाई आजै बयान सकेर पोखरा फर्काइने बताइएको छ ।
यद्यपि खराब मौसमका कारण साढे ४ घण्टा ढिला गरी भैरहवा ल्याइएकामा अब उनलाई कतिबेला फर्काइन्छ यकिन छैन ।
