काठमाडौँ । राजसंस्था पुनःस्थापित गर्ने मागलाई आफ्नो प्रमुख मुद्दा बनाएको संसदीय प्रणालीमा सक्रिय दल राष्ट्रिय प्रजातन्त्र पार्टी (राप्रपा) भित्र दुई धार देखिएको छ । शुक्रबार राजावादीहरुले राजधानीको तीनकुनेमा हिंसा मच्याएपछि राप्रपामा विवाद देखिएको हो ।

आफ्ना पार्टीका वरिष्ठ उपाध्यक्ष रविन्द्र मिश्र र महामन्त्री धवलशमशेर जबरा सहितका नेता तथा कार्यकर्ता पक्राउ पर्दासमेत अध्यक्ष राजेन्द्र लिङ्देन भेट्न नगएको र आन्दोलन राप्रपाको होइन भन्ने अभिव्यक्ति दिएसँगै बाँकी पदाधिकारीहरूले आक्रोश व्यक्त गरेका हुन् ।

राप्रपाको बैठक दिउँसो ३ बजे बस्दैछ । उक्त बैठकमा आन्दोलनको स्वामित्व लिने कि नलिने भन्नेमा चर्को रुपमा विषय उठाउने बताइएको छ । 

स्वामित्व नलिने हो भने राप्रपामा बसिरहनुको कुनै अर्थ नरहेको भन्दै लिङ्देनलाई चर्को दबाब दिने तयारीमा नेताहरु देखिएका छन् । 

यद्यपि शुक्रबारको आन्दोलन त्यो मोडलमा तय भएको थिएन । एक्कासी हिंसात्मक शैलीमा कार्यकर्ताहरु उत्रिएपछि तनाव सिर्जना भएको हो । 

पूर्वराजाका समर्थकले तीनकुने क्षेत्रमा शान्तिपूर्ण प्रदर्शनको लागि पूर्वअनुमति लिएका थिए । तर उक्त प्रदर्शनका क्रममा निषेधित क्षेत्रसमेत तोडी निजी सम्पत्ति, अस्पताल, सञ्चारगृह, राजनीतिक दलका कार्यालय, व्यापारिक क्षेत्रलगायत यातायातका सवारी साधनमाथि तोडफोड भएको प्रहरीले जनाएको छ ।

प्रहरीले मानवीय र भौतिक क्षति भएको घटनाप्रति गम्भीर ध्यानाकर्षण भएको उल्लेख गर्दै क्षतिको विवरणसमेत सार्वजनिक गरेको छ । तीनकुने घटनामा परी कीर्तिपुर–४ का सविन महर्जनको उपचारको क्रममा त्रिभुवन विश्वविद्यालय शिक्षण अस्पतालमा निधन भएको घोषणा गरिएको प्रहरीले जनाएको छ । 

तीनकुनेस्थित मार्बल हाउसमा सुरेश रजक मृत अवस्थामा फेला परेको प्रहरीले जनाएको छ । सो घटनामा परी नेपाल प्रहरीका ५३ जना, सशस्त्र प्रहरी बलका २२ र प्रदर्शनकारीतर्फ ३५ जना घाइते भएका थिए ।

यसैगरी नौ वटा सरकारी सवारी साधन, छ वटा सरकारी वा निजी नखुलेका सवारी साधनमा आगजनी भएको छ । 

विभिन्न १४ स्थानमा आगजनी भएको, नौ वटा संस्थामा तोडफोड र एक स्थानमा लुटपाट भएको जिल्ला प्रहरी परिसर प्रहरी उपरीक्षक अपीलराज बोहराले जानकारी दिए ।

एकाएक माहोल बिग्रिएपछि सुरक्षा संयन्त्रमाथि पनि प्रश्नचिन्ह खडा भएको थियो । स्थिति बिग्रिन सक्छ भन्ने अवस्था आँकलन नगरी खुला छाडिदिँदा अकालमा दुई जनाले ज्यान गुमाउनु परेको छ । 

यसको जिम्मा राप्रपाले नलिइ सुखै छैन ।