झापा । झापा जिल्लामा एक व्यक्तिमा कोरोना भाइरसको नयाँ भेरियन्ट फेला परेको छ । स्वास्थ कार्यालय झापाले बिर्तामोड नगरपालिका वडा नं ५ का स्थानीय ५२ वर्षे महिलामा कोरोना भाइरसको नयाँ भेरिएन्ट देखिएको जनाएको हो ।
स्वास्थ्य कार्यालय झापाका प्रमुख रमेश बाह्राकोटीले उक्त संक्रमणबारे जानकारी दिएका हुन् । जिल्लास्थित बिर्तासिटी अस्पतालमा गरिएको कोरोना परीक्षणका क्रममा ती महिलाको रिपोर्ट पोजिटिभ प्रमाणित भएको अस्पताल श्रोतले जनाएको छ ।
हाल ती संक्रमित महिला घरमै सुरक्षित साथ आइसोलेसनमा बसेको र उनको स्वास्थ्य अवस्था सामान्य रहेको जनाइएको छ ।
नयाँ संक्रमित पुष्टि भएपछि बिर्तामोड नगरपालिका स्वास्थ्य शाखाले सचेतना अपनाउन आग्रह गरेको छ ।
पुरानो तथ्यांक अनुसार झापामा कूल १ लाख ३ सय ८१ जनाको पीसीआर परीक्षण र ४२ हजार ४१० जनाको एन्टिजेन परीक्षण गरिएको थियो ।
जसमध्ये हालसम्म झापामा जम्मा २८ हजार ९ सय ९ जना संक्रमित पुष्टि भएको र संक्रमित ६ सय ७२ जनाको मृत्यु भएको छ ।
