काठमाडौं। आणविक हतियारको पूर्ण उन्मूलनसम्बन्धी चेतनामूलक कार्यक्रमका साथ आज अन्तर्राष्ट्रिय आणविक निःशस्त्रीकरण दिवस विश्वभर मनाइँदै छ।
संयुक्त राष्ट्रसङ्घको आह्वानमा यो दिवस सन् २०१३ देखि मनाउन सुरु भएको हो। यद्यपि, विश्वव्यापी आणविक निःशस्त्रीकरणका निम्ति राष्ट्रसङ्घीय महासभामा सन् १९४६ मा नै पहिलो प्रस्ताव पेस भएको थियो।
राष्ट्रसङ्घका अनुसार, विश्वमा आज पनि करिब १२ हजार २४१ आणविक हतियारहरू विभिन्न देशमा बाँकी रहेका छन्। यस अवसरमा राष्ट्रसङ्घका महासचिव एन्टोनियो गुटरेसले आणविक हतियार भएका राष्ट्रहरूलाई हतियारहरूको पूर्ण उन्मूलनका लागि प्रतिबद्ध हुन आह्वान गरेका छन्।
