च्यतिनु पर्छ दासताका पर्दाहरू
भत्काइनु पर्छ मठ, मन्दिर र देवालयहरू
भत्काइनु पर्छ गुम्बा, मस्जिद र चर्चहरू
ओ, गुरु पुरोहितहरू
ओ, लामा, इमाम र पोपहरू
पाप र पुण्यको दुहाई दिएर
छलकपट गर्दै हुनुहुन्छ तपाईंहरू ।
मैले प्रतिवाद गर्नै पर्छ
तपाइहरूको नाटकीय व्यवहार देखे पछि
कहाँ छ पाप ?
कहाँ छ पुण्य ?
कहाँ छ नर्क ?
कहाँ छ स्वर्ग ?
तथाकथित भ्रम छरेर
मानवता माथि खेलवाड गरिरहनु भएको छ तपाईंहरू ।
के युद्ध धर्म हो ?
युद्धका नाममा मारिएका छन मान्छेहरू
किन रोक्न सक्नु भएन युद्ध ?
लाखौ लाख हताहत हुँदा पनि
मान्छेहरू रोइरहेका छन
मान्छेहरू चिच्च्याइ रहेका छन
मन्दिर, गुम्बा, मस्जिद र चर्च अगाडि नै
किन सुन्दैन भगवान ?
मानिसका आर्तनादहरू ।
भो, छोड्दिनुस् भ्रम छर्न
मान्छेलाई कति दिन ढाँटेर राख्नुहुन्छ
जताततै कोलाहल र त्राश छ
गरिबी अशिक्षा र अनिकाल छ
किन हटाउन सकेन ?
तपाईको धर्मले कोलाहल र त्राश
गरिबी अशिक्षा र अनिकाल
तपाईहरूको पाखण्डी नियममा
को बस्छ सधै भरी ?
मान्छे उन्मुक्ति चाहान्छ
थन्क्याउनोस् तपाईका भ्रमित भगवानहरू ।
मान्छेहरू अकालमै मरिरहेका छन्
किन रोकिँदैन अकाल मृत्यु ?
तपाईंको परमेश्वर के हेरिबस्छ ?
तपाईं अन्यायमा परेको बेला न्याय पाउनु हुन्न भने ।
तपाईंहरू विरुद्ध धर्म युद्ध लड्नु छ अब मैले
किन रोक्न सक्नु भएन ?
हत्या, हिंसा र आतंक
के यही हो धर्म युद्ध ?
धर्मकै नाममा मानवता मर्नु परे पछि ।
किन चाहियो भगवान् ?
मान्छेको मर्म नबुझेपछि ।
म शुली चढ्न तयार छु
म विद्रोह गर्न तैयार छु
तपाईहरूकै तथाकथित धार्मिक अन्धता माथि
म अनुयायी बन्न सक्तिनँ
डढाइ देउ धर्म ग्रन्थहरू
मैले खरानीको टीका लगाउनै छ ।
तपाईहरू ढोंगी विरालो जस्तै हो
मुसा मार्नु हुँदैन भन्दै
निर्ममतापूर्वक मुसाकै शिकार गर्ने धुर्त विरालो जस्तो
छोडिदिनुस धार्मिक अन्धता
धर्म अफिम जस्तै हो
नसामा बहुलठ्ठीपन देखाउनु हुन्छ किन ?
म खेद प्रकट गरिरहेछु
धर्मको नाममा पाप गर्नेहरूप्रति ।
