ईश्वर पोखरेलले बुझाए पार्टी महाधिवेशनका लागि तयार पारिएको अवधारणा पत्र [भिडियो]
हाम्रा कुरा
प्रकाशित २०८२ मंसिर २२ सोमबार
754
Shares
काठमाडौँ । नेकपा (एमाले) का वरिष्ठ उपाध्यक्ष ईश्वर पोखरेलले पार्टीको ११औँ महाधिवेशनलाई लक्षित गरी तयार पारिएको अवधारणा पत्र सोमबार अपरान्ह च्यासलस्थित पार्टीको केन्द्रिय कार्यालयमा बुझाएका छन्। अध्यक्ष केपी शर्मा ओलीलाई भेटेर बुझाउन अनुकूल नभएपछि उनी आफू पक्षका नेताहरूसहित पुगेर महासचिव शङ्कर पोखरेललाई उक्त अवधारणा पत्र हस्तान्तरण गरेका हुन्।
वरिष्ठ उपाध्यक्ष पोखरेलका अनुसार, यो अवधारणा पत्र पार्टीको तर्फबाट प्रस्तुत हुने दस्तावेजहरूमा आवश्यक विषयवस्तु समेटियोस् भन्ने उद्देश्यले तयार पारिएको हो। अवधारणा पत्रमा पार्टीको निर्माण, सञ्चालन, सामूहिक नेतृत्व प्रणालीलाई कसरी चलाउनुपर्छ, पार्टीभित्रको नियन्त्रण र सन्तुलनको परिचालन कसरी गर्ने, र पार्टी जनताको बहुदलीय जनवादबाट निर्देशित भएर कसरी चल्नुपर्छ भन्ने विषयहरू केन्द्रित छन्। उनले आफूहरूले यो अवधारणा पत्र महाधिवेशनमा व्यवस्थित रूपमा राख्ने बताए।
वरिष्ठ उपाध्यक्ष पोखरेलले आफूहरूले पार्टीमा नेतृत्वमा पुनर्गठन चाहेको र यो नभए पार्टी गलत ढङ्गले अघि बढ्ने जिकिर गरे। उनले "यदि पुनर्गठन राम्रो गरियो भने पार्टी थप प्रभावकारी ढङ्गले जान सक्छ। पुनर्गठनको काम ठिक ढङ्गले हुन सकेन भने पार्टी यथास्थितिमा र उल्टो दिशातर्फ जान सक्छ" भन्ने आफ्नो राय रहेको स्पष्ट पारे।
महाधिवेशनका लागि प्रतिनिधि चयनमा केही ठाउँमा देखिएको समस्याबारे बोल्दै उनले विवादित कुराहरूलाई सङ्गठन विभागको तर्फबाट सच्याउने काम भइसकेको बताए। यद्यपि, केही जिल्लामा प्रतिनिधि छनौट गर्ने सिलसिलामा 'अस्वस्थ खालका गतिविधि' देखिएको र त्यसलाई निरूपण गर्ने मामिलामा पनि अलि ठिक ढङ्गले नभएको कुरा अध्यक्ष ओलीलाई केही दिनअघि भेट्दा पनि राखिएको जानकारी दिए।
