काठमाडौँ ।  मस्कोले रुसी जेलमा रहेका फ्रान्सेली अनुसन्धानकर्ता लरेन्ट भिनाटियरको मुद्दाका सम्बन्धमा पेरिसलाई एक विशेष प्रस्ताव पठाएको छ। जासुसीको आरोपमा २० वर्षसम्मको जेल सजाय हुन सक्ने यस संवेदनशील मुद्दामा छलफलका लागि मस्को सकारात्मक देखिएपछि रुस र फ्रान्सबीचको कूटनीतिक सम्बन्धमा नयाँ हलचल पैदा भएको छ। 

यो आश्चर्यजनक प्रस्ताव सार्वजनिक भएपछि रुसी राष्ट्रपति भ्लादिमिर पुटिन र फ्रान्सेली राष्ट्रपति इमानुएल म्याक्रोनबीच सम्भावित वार्ताका लागि दुवै देशले चासो देखाएका छन्। स्विस गैर-सरकारी संस्थाका लागि द्वन्द्व मध्यस्थताको काम गर्ने भिनाटियर जुन २०२४ देखि जेलमा छन्। सुरुमा 'विदेशी एजेन्ट' को रूपमा नाम दर्ता गर्न असफल भएको आरोपमा तीन वर्षको सजाय भोगिरहेका उनीमाथि हाल रुसी सैन्य जानकारी सङ्कलन गरेको भन्दै जासुसीको नयाँ गम्भीर आरोप लगाइएको छ।

क्रेमलिनका प्रवक्ता दिमित्री पेस्कोभले सञ्चारकर्मीहरूसँग कुरा गर्दै फ्रान्सेली पक्षसँग यसबारे उचित सम्पर्क भएको र प्रस्ताव पठाइएको पुष्टि गरेका छन्। उनले प्रस्तावको विस्तृत विवरण प्रदान नगरे पनि अबको कदमको निर्णय फ्रान्सको हातमा रहेको स्पष्ट पारेका छन्। 

भिनाटियरको परिवारले भने उहाँमाथि लागेका आरोपहरूलाई अस्वीकार गर्दै उनी युक्रेन युद्धका कारण उत्पन्न मस्को र पेरिसबीचको तनावको सिकार भएको बताएका छन्। पश्चिमा देशहरूले रुसले आफ्ना नागरिकहरूलाई आधारहीन आरोपमा पक्राउ गरी पश्चिमा जेलमा रहेका रुसी जासुस वा साइबर अपराधीहरूको रिहाइका लागि 'बार्गेनिङ चिप' को रूपमा प्रयोग गर्ने गरेको आरोप लगाउँदै आएका छन्।

राष्ट्रपति पुटिनले गत हप्ता मात्रै आफूलाई यस मुद्दाको बारेमा पहिले जानकारी नभएको तर अब ध्यानपूर्वक हेरेर कानुनी दायराभित्रै रहेर समाधानको पहल गर्ने आश्वासन दिएका थिए। म्याक्रोनले पनि भिनाटियरलाई अन्यायपूर्ण रूपमा हिरासतमा राखिएको भन्दै रिहाइका लागि निरन्तर आग्रह गर्दै आएका छन्। 

यसअघि अमेरिकी राष्ट्रपति डोनल्ड ट्रम्प र पूर्ववर्ती जो बाइडेनको मध्यस्थतामा पनि केही अमेरिकी नागरिकहरू रुसी जेलबाट रिहा भएका उदाहरणहरू छन्। भिनाटियरले रुसी अधिकारीहरूसँग दर्ता नभई सैन्य सूचना सङ्कलन गरेको मुख्य अभियोगमा आफूले अन्जानमा दर्ता नगरेको भन्दै माफी मागेका छन्। पछिल्लो विकसित घटनाक्रमले युक्रेन युद्धका बीच मस्को र पेरिसबीच कूटनीतिक संवादको नयाँ ढोका खोल्ने सम्भावना देखिएको छ।