टेस्लालाई पछि पार्दै बीवाईडी बन्यो विश्वकै नम्बर एक ईभी बिक्रेता
हाम्रा कुरा
प्रकाशित २०८२ पुष १९ शनिबार
1.7k
Shares
काठमाडौँ । विद्युतीय सवारी साधनको विश्वव्यापी बजारमा सन् २०२५ मा एउटा ठुलो परिवर्तन देखिएको छ। अमेरिकी कम्पनी टेस्लाको वार्षिक बिक्रीमा गिरावट आएसँगै चिनियाँ अटो निर्माता बीवाईडीले पहिलो पटक टेस्लालाई उछिनेर विश्वकै सबैभन्दा ठुलो विद्युतीय सवारी बिक्रेताको रूपमा आफूलाई स्थापित गरेको छ। शुक्रबार सार्वजनिक गरिएको विवरणअनुसार टेस्लाको विश्वव्यापी डेलिभरी अघिल्लो वर्षको तुलनामा करिब आठ दशमलव छ प्रतिशतले घटेको छ।
तथ्याङ्कअनुसार टेस्लाले सन् २०२५ मा करिब १६ लाख ५५ हजार विद्युतीय सवारी उत्पादन गरेको थियो भने १६ लाख ३६ हजार डेलिभर गरेको थियो। यसको तुलनामा सन् २०२४ मा कम्पनीले १७ लाख ७३ हजार सवारी उत्पादन र १७ लाख ८९ हजार सवारी डेलिभर गरेको थियो।
विशेषगरी अमेरिकामा विद्युतीय सवारी खरिद गर्दा पाइने कर छुट सन् २०२५ को सेप्टेम्बरदेखि हटाइएपछि टेस्लाको बिक्रीमा ठुलो नकारात्मक असर परेको कम्पनीको भनाइ छ। वर्षको चौथो त्रैमासिकमा मात्रै टेस्लाको डेलिभरी अघिल्लो वर्षको सोही अवधिको तुलनामा करिब १६ प्रतिशतले घटेर ४ लाख १८ हजारमा सीमित भएको छ।
अर्कोतर्फ चिनियाँ कम्पनी बीवाईडीले सन् २०२५ मा चामत्कारिक प्रगति गर्दै २२ लाख ५७ हजारभन्दा बढी पूर्ण विद्युतीय सवारी (BEV) बिक्री गरेको छ। यो सङ्ख्या अघिल्लो वर्षको तुलनामा करिब २८ प्रतिशतको वृद्धि हो। बीवाईडीले चीनको आन्तरिक बजारमा मात्र नभई एसिया, युरोप र ल्याटिन अमेरिकामा समेत आफ्नो पहुँच तीव्र रूपमा विस्तार गरिरहेको छ।
टेस्ला अझै पनि अमेरिकाको ४५ प्रतिशत बजार हिस्सासहित त्यहाँको शीर्ष कम्पनी रहे पनि समग्र अमेरिकी ईभी बजारमा सुस्तता देखिएको छ। कक्स अटोमोटिभका अनुसार सन् २०२५ को नोभेम्बरमा अमेरिकामा समग्र ईभी बिक्री ४० प्रतिशतले घटेको थियो र सन् २०२६ मा पनि यो क्षेत्रमा चुनौतीहरू कायमै रहने विश्लेषकहरूको अनुमान छ।
