अमेरिकी र चिनियाँ अल्गोरिदमबाट बालबालिकालाई जोगाउने म्याक्रोनको अठोट
१५ वर्षमुनिका बालबालिकालाई सामाजिक सञ्जालमा प्रतिबन्ध लगाइँदै
हाम्रा कुरा
प्रकाशित २०८२ माघ ११ आइतबार
2k
Shares
काठमाडौँ । फ्रान्सका राष्ट्रपति इमानुएल म्याक्रोनले १५ वर्षमुनिका बालबालिकालाई सामाजिक सञ्जालको प्रयोगमा पूर्ण प्रतिबन्ध लगाउने कानुनी प्रक्रियालाई तीव्र बनाउने आफ्नो प्रतिबद्धता शनिबार पुनः दोहोर्याएका छन्।
बिएफएम टेलिभिजनमार्फत सार्वजनिक गरिएको एक भिडियो सन्देशमा उनले यससम्बन्धी कानुनलाई आगामी सेप्टेम्बरको नयाँ शैक्षिक सत्रदेखि नै लागू गर्ने लक्ष्यका साथ सरकारलाई द्रुत प्रक्रिया सक्रिय गर्न निर्देशन दिएको जानकारी दिए।
फ्रान्सेली संसद्मा सोमबार पेस हुन लागेको विधेयकको मस्यौदामा इन्स्टाग्राम, टिकटक र युट्युबजस्ता लत लाग्ने प्लेटफर्महरूमा बालबालिकाको पहुँच रोक्ने प्रावधान राखिएको छ। म्याक्रोनले सामाजिक सञ्जालको प्रतिबन्धसँगै विद्यालय हाताभित्र विद्यार्थीहरूलाई मोबाइल फोन बोक्न समेत निषेध गर्ने नीतिको कडा समर्थन गरेका छन्।
बालबालिकाको मानसिक स्वास्थ्य र बौद्धिक विकासलाई प्राथमिकता दिँदै उनले आफ्ना किशोरकिशोरीहरूको दिमाग अमेरिकी प्लेटफर्म वा चिनियाँ अल्गोरिदमद्वारा नियन्त्रित हुन नदिने दृढता व्यक्त गरे।
गत महिना मात्र अस्ट्रेलियाले १६ वर्षभन्दा कम उमेरका बालबालिकालाई सामाजिक सञ्जालमा प्रतिबन्ध लगाउने विश्वकै पहिलो देशको रूपमा कानुन पारित गरेको थियो, जसलाई पछ्याउँदै फ्रान्सले पनि कडा कदम चाल्न लागेको हो।
राष्ट्रपति म्याक्रोनले बालबालिकाको दिमाग 'बिक्रीका लागि नभएको' उल्लेख गर्दै प्रविधि कम्पनीहरूको व्यापारिक स्वार्थबाट उनीहरूलाई जोगाउनु राज्यको दायित्व भएको बताएका छन्।
