काठमाडौँ। बंगलादेशका अन्तरिम सरकार प्रमुख मोहम्मद युनुसले बिहीबार ढाकास्थित एक मतदान केन्द्रमा आफ्नो मत खसाल्दै देशमा १३ औँ राष्ट्रिय संसदीय निर्वाचन तथा संवैधानिक जनमतसंग्रहको सुरुआत गरेका छन्। अन्तरिम प्रशासनको नेतृत्व गरिरहेका उनले यस निर्वाचन र जनमतसंग्रहलाई राष्ट्रिय हर्ष र पुनर्जागरणको क्षणको रूपमा वर्णन गरे। 

"आज नयाँ बंगलादेशको जन्मदिन हो र हामी यो दिनभर मनाउनेछौँ," उनले करिब १८ महिना अघि विद्यार्थी नेतृत्वको आन्दोलनले शेख हसिनाको सरकार ढालेपछिको पहिलो निर्वाचनबारे प्रतिक्रिया दिँदै भने। युनुसका अनुसार यस प्रक्रियामार्फत जनताले विगतको 'दुःस्वप्न' लाई त्यागेर नयाँ बंगलादेश निर्माण गर्ने अवसर पाएका छन्। उनले उम्मेदवार छनोटसँगै जनमतसंग्रह झन् महत्वपूर्ण रहेको र यसले सम्पूर्ण बंगलादेशको भविष्य परिवर्तन गर्ने उल्लेख गरे।

युनुसले बिहीबार बिहान ढाकाको गुलशन मोडेल स्कुल एन्ड कलेज केन्द्रमा मतदान गरेका हुन्। उनीसँगै लाखौँ बंगलादेशी नागरिकहरू लोकतान्त्रिक शासन पुनस्र्थापनाको यो महत्वपूर्ण कदममा सहभागी भइरहेका छन्। बिहानैदेखि मतदान केन्द्रहरूमा मतदाताको उत्साहजनक उपस्थिति र लामो लाइन देखिएको छ, जसले पारदर्शी निर्वाचनप्रतिको ठूलो आशा झल्काउँछ। 

पूर्व प्रधानमन्त्री खालिदा जियाको निधन र शेख हसिनाको पार्टीमाथिको प्रतिबन्धका बीच भइरहेको यो निर्वाचनले बंगलादेशलाई दशकौँदेखिको ‘बेगमहरूको लडाइँ’ बाट मुक्त गर्ने अपेक्षा गरिएको छ। निर्वाचन आयोगले आजै दिउँसो ४ बजेदेखि मतगणना सुरु गर्ने र फेब्रुअरी १३ को बिहानसम्म आधिकारिक नतिजा सार्वजनिक गर्ने तयारी गरेको छ।

करिब १२ करोड ७० लाख योग्य मतदाता रहेको बंगलादेशमा यो निर्वाचन धेरै दृष्टिले विशेष छ। कुल मतदातामध्ये आधाजसो १८ देखि ३७ वर्ष उमेर समूहका छन् भने ४५ लाखभन्दा बढीले पहिलोपटक मतदान गर्दैछन्। अवामी लिग प्रतिबन्धित भए पनि अन्य ५१ राजनीतिक दलका १,९८१ उम्मेदवार चुनावी मैदानमा उत्रिएका छन्। यसपटक भ्रष्टाचार, महँगी र आर्थिक विकास मुख्य मुद्दा बनेका छन्। संसदीय निर्वाचनसँगै मोहम्मद युनुसको नेतृत्वमा तयार पारिएको ‘नेशनल चार्टर २०२५’ सम्बन्धी जनमतसंग्रह पनि भइरहेको छ, जसले देशको भविष्यको शासन व्यवस्थाको आधार तय गर्नेछ।