लेबनानमा इजरायलको नयाँ चेतावनी: ५० वटा स्थान खाली गर्न आदेश, भीषण आक्रमणको तयारी
लेबनानका दर्जनौँ गाउँमा बमबारी, ३१ को मृत्यु
हाम्रा कुरा
प्रकाशित २०८२ फागुन १९ मंगलबार
2.2k
Shares
काठमाडौँ । इजरायली सेनाले लेबनानका दर्जनौँ स्थानहरूमा मङ्गलबार नयाँ निकासी आदेश जारी गरेको छ। इजरायली सेनाका अरबी भाषाका प्रवक्ता अविचाय अद्राईले एक विज्ञप्ति जारी गर्दै ५० वटा विभिन्न स्थानका बासिन्दाहरूलाई आफ्नो सुरक्षाका लागि तुरुन्तै सुरक्षित स्थानमा जान आग्रह गरेका छन्।
निकासी आदेश जारी गरिएका अधिकांश स्थानहरू लेबनानको दक्षिणी भेगमा पर्दछन्। इजरायलले यस क्षेत्रमा रहेका सशस्त्र समूह हिजबुल्लाहका सैन्य पूर्वाधारहरूलाई लक्षित गरी निरन्तर प्रहार गर्ने उद्देश्यले यस्तो आदेश दिएको जनाएको छ। यसअघि सोमबार मात्रै लेबनान सरकारले हिजबुल्लाहको सैन्य र सुरक्षा गतिविधिमा प्रतिबन्ध लगाउने निर्णय गरेको थियो।
इरानी सर्वोच्च नेता अली खामेनीको हत्याको बदला लिन सोमबार इरान र हिजबुल्लाहले इजरायलमा भीषण प्रहार गरेपछि इजरायलले यो नयाँ निकासी आदेश र जवाफी हमला सुरु गरेको हो। इजरायलले सोमबार बेरुतको दक्षिणी उपनगरहरू र दक्षिण लेबनानका दर्जनौँ गाउँहरूमा बमबारी गरेको छ। साथै, इजरायलले हिजबुल्लाहलाई थप भयानक आक्रमणको सामना गर्न तयार रहन चेतावनी समेत दिएको छ।
लेबनानको स्वास्थ्य मन्त्रालयका अनुसार पछिल्लो आक्रमणमा कम्तीमा ३१ जनाको मृत्यु भएको छ भने १४९ जना घाइते भएका छन्। क्षेत्रमा तनाव बढ्दै जाँदा सर्वसाधारणहरू सुरक्षित स्थानको खोजीमा विस्थापित हुने क्रम तीव्र बनेको छ।
