काठमाडौँ ।  मध्यपूर्वमा जारी युद्ध थप भयानक बन्दै गएको छ। आइतबार इरानले संयुक्त अरब इमिरेट्स (युएई), बहराइन र कुवेतका महत्वपूर्ण नागरिक सुविधा तथा ऊर्जा पूर्वाधारहरूलाई लक्षित गरी ड्रोन र क्षेप्यास्त्र आक्रमण गरेको छ। 

फेब्रुअरीको अन्त्यमा अमेरिका र इजरायलले इरानमाथि गरेको आक्रमणको बदलास्वरुप इरानले खाडी मुलुकहरूमाथि यी आक्रमणहरू तीव्र पारेको हो।

कुवेत पेट्रोलियम कर्पोरेसनका अनुसार इरानी ड्रोन आक्रमणबाट तेल र पेट्रोकेमिकल प्रशोधन केन्द्रहरूमा गम्भीर क्षति पुगेको छ। पेट्रोकेमिकल इन्डस्ट्रिज कम्पनीका धेरै सुविधाहरूमा आगलागी भएको र ठूलो भौतिक नोक्सानी भएको बताइएको छ। 

यसबाहेक, कुवेतको विद्युत् तथा जल मन्त्रालयले दुईवटा विद्युत् र पानी प्रशोधन (डिसेलिनेशन) प्लान्टमा समेत क्षति पुगेको जानकारी दिएको छ। यद्यपि, सरकारी भवनहरूमा क्षति पुगे पनि मानवीय क्षति भने नभएको कुवेती अर्थ मन्त्रालयले स्पष्ट पारेको छ।

संयुक्त अरब इमिरेट्सको रुवाइस औद्योगिक शहरस्थित बोरुज पेट्रोकेमिकल्स प्लान्टमा विशाल आगलागी भएको छ। युएईको रक्षा मन्त्रालयका अनुसार हवाई रक्षा प्रणालीले इरानी ड्रोनलाई बीचैमा नष्ट गरे पनि त्यसको भग्नावशेष खस्दा विष्फोट र आगलागी भएको हो। 

सुरक्षा सतर्कताका लागि त्यहाँका सेवाहरू तत्काल स्थगित गरिएका छन्। उता, बहराइनको सरकारी ऊर्जा कम्पनी 'बाप्को एनर्जी'ले पनि आइतबार बिहान इरानी ड्रोन आक्रमणका कारण आफ्नो भण्डारण ट्याङ्कीमा आगलागी भएको पुष्टि गरेको छ।

इरानले खाडी मुलुकहरूले आफ्नो भूमिबाट अमेरिकी सेनालाई आक्रमणको अनुमति दिएको आरोप लगाउँदै उनीहरूका औद्योगिक पूर्वाधारलाई निशाना बनाएको बताएको छ। 

इरानी सरकारी समाचार संस्था आइआरएनएका अनुसार शनिबार युएईको आल्मुनियम उद्योग र कुवेतमा रहेका अमेरिकी सैन्य संरचनाहरूलाई समेत लक्षित गरिएको थियो। यसअघि शनिबार दक्षिण–पश्चिम इरानको पेट्रोकेमिकल क्षेत्रमा भएको आक्रमणमा पाँच जनाको मृत्यु भएको इरानी अधिकारीहरूले बताएका थिए।

खाडी क्षेत्रका ऊर्जा पूर्वाधारमा भएको यो आक्रमण र विश्वकै महत्वपूर्ण जलमार्ग 'हर्मुज घाँटी' प्रभावकारी रूपमा बन्द हुनाले विश्व अर्थतन्त्र तहसनहस हुने खतरा बढेको छ। 

विशेष गरी खाडी मुलुकहरू पिउने पानीका लागि निर्भर रहने डिसेलिनेशन प्लान्टहरूमा क्षति पुग्दा मानवीय संकटको जोखिम समेत बढेको छ। खाडी मुलुकहरूले भने इरानको आरोप खण्डन गर्दै आएका छन्।