काठमाडौँ। महिला भलिबलको प्रतिस्पर्धात्मक माहोल फेरि एकपटक काठमाडौँमा देखिने भएको छ। आजदेखि शुरू हुने काभा महिला भलिबल च्याम्पियनशिपमा घरेलु टोली नेपालसहित आठ राष्ट्र उपाधिका लागि प्रतिस्पर्धामा उत्रदैछन्।

घरेलु समर्थकको साथ, अनुभवी र युवा खेलाडीको मिश्रण तथा पछिल्ला अन्तर्राष्ट्रिय प्रतियोगिताबाट बढेको आत्मविश्वासका कारण नेपालमाथि यसपटक विशेष चासो देखिएको छ ।

प्रतियोगितामा नेपाल, भारत, कीर्गिस्तान र माल्दिभ्स समूह ‘ए’ मा छन् भने इरान, काजखस्तान, श्रीलंका र बंगलादेश समूह ‘बी’ मा छन् ।

नेपालले आफ्नो पहिलो खेल आजको उद्घाटनमा साविक विजेता भारतविरुद्ध खेल्दै प्रतियोगिताको शुरूआत गर्नेछ ।

नेपाल-भारतबीचको प्रतिस्पर्धालाई प्रतियोगिताकै आकर्षक खेलका रूपमा हेरिएको छ ।

बिहीबार आयोजित प्रिम्याच पत्रकार सम्मेलनमा निरुता ठगुन्नाले घरेलु कोर्टमा खेल्दा दर्शकको साथ टोलीका लागि ठूलो ऊर्जा बन्ने बताइन् ।

पहिलो पटक राष्ट्रिय टोलीको कप्तानी गरिरहेकी निरुताले टोलीमा अनुभवी र युवा खेलाडीबीच राम्रो समन्वय रहेको उल्लेख गर्दै नेपाल राम्रो प्रदर्शनका लागि तयार रहेको बताइन् ।

उनले भनिन्,‘घरेलु दर्शकको साथले खेलाडीलाई थप हौसला दिन्छ। हाम्रो तयारी राम्रो छ र हामी प्रतियोगितामा सकारात्मक सुरुआत गर्ने लक्ष्यमा छौँ ।’

यस्तै, साविक विजेता भारतकी कप्तान नन्दनाले छोटो तयारी भए पनि टोली उपाधि रक्षा गर्ने लक्ष्यसहित काठमाडौँ आएको बताइन् । उनले दक्षिण एसियाली टोलीहरूबीच प्रतिस्पर्धा पछिल्ला वर्षहरूमा झनै कडा बन्दै गएको उल्लेख गरिन् ।

काजखस्तानकी कप्तान नतालियाले पनि सीमित तयारीका बाबजुद आफ्नो टोली उपाधि जित्ने लक्ष्यका साथ मैदानमा उत्रिने बताइन् ।

नेपालमा पछिल्ला वर्षहरूमा महिला भलिबलप्रति दर्शकको आकर्षण उल्लेख्य रूपमा बढ्दै गएको छ ।

घरेलु मैदानमा हुने अन्तर्राष्ट्रिय प्रतियोगितामा दर्शकको उत्साहपूर्ण उपस्थितिले नेपाली टोलीलाई अतिरिक्त आत्मविश्वास दिने अपेक्षा गरिएको छ ।

यही कारण यसपटकको काभा महिला च्याम्पियनशिप केवल उपाधि प्रतिस्पर्धामामात्र सीमित नभई नेपाली महिला भलिबलको लोकप्रियता र सम्भावनाको अर्को परीक्षणका रूपमा पनि हेरिएको छ ।