काठमाडौँ । राष्ट्रिय स्वतन्त्र पार्टी (रास्वपा) को विभिन्न जिल्लाहरूमा सम्पन्न प्रथम अधिवेशनबाट नयाँ नेतृत्व चयन गरिएको छ। पाँचथर, तनहुँ र बाँके जिल्लामा नयाँ कार्यसमिति निर्वाचित भएका हुन्।

फिदिमस्थित जिल्ला समन्वय समितिको सभाहलमा सम्पन्न प्रथम अधिवेशनले प्रकाश गुरुङको सभापतित्वमा १३ सदस्यीय नयाँ कार्यसमिति निर्वाचित गरेको छ। समितिको उपसभापतिमा सहरसिंह तामाङ, सचिवमा कुशल जबेगु, सहसचिवमा कविहाङ सेलिङ र कोषाध्यक्षमा सिर्जना रिजाल निर्वाचित भएका छन्। सभापति गुरुङ र उपसभापति तामाङ पुरानै जिम्मेवारीमा दोहोरिएका हुन्।

यस्तै, सदस्यहरूमा ज्ञानेन्द्र रसाईली, रुद्र चम्लागाईं, रेखा लावती, सविना राई, ईश्वरीप्रसाद निरौला, प्रयागराज सुवेदी, खगेन्द्र सिग्देल र इन्द्र लावती चयन भएका छन्। अधिवेशनले केन्द्रीय महाधिवेशन प्रतिनिधिमा ४ जना र प्रदेश अधिवेशन प्रतिनिधिमा २ जना निर्वाचित गर्नुका साथै ३२ वटा विभाग समेत गठन गरेको छ।

रास्वपा तनहुँको अध्यक्ष पदमा पुनः विश्व बाँस्तोला निर्वाचित भएका छन्। आइतबार भएको निर्वाचनमा १८७ मत प्राप्त गर्दै उनी विजयी भएका हुन् भने उनका प्रतिद्वन्द्वी डा. शेषरमण न्यौपानेले ६४ मत पाएका थिए।

उपसभापति पदमा १३१ मतका साथ विष्णुबहादुर पन्त विजयी भए भने उनका प्रतिस्पर्धी पदराज न्यौपानेले १२४ मत प्राप्त गरे। यसै गरी सचिवमा अनिल श्रेष्ठ सर्वसम्मत निर्वाचित भएका छन् भने सहसचिवमा १२७ मतका साथ दुर्गाकुमार श्रेष्ठ विजयी भएका छन्।

साथै रास्वपा बाँकेको सभापति पदमा विवेककुमार श्रेष्ठ सर्वसम्मत रूपमा चयन भएका छन्। शनिबार भएको मतदानमा कुनै पनि उम्मेदवारले वैधानिक व्यवस्था अनुसारको ५१ प्रतिशत मत ल्याउन नसकेपछि बढी मत ल्याउने दुई उम्मेदवारबीच पुनः मतदान गराउनु पर्ने थियो। तर, आपसी सहमति जुटाउँदै आइतबार श्रेष्ठलाई सभापति घोषणा गरियो। पहिलो चरणको मतदानमा श्रेष्ठले ८५ र उनका निकटतम प्रतिद्वन्द्वी आनन्दबाबु काफ्लेले ५२ मत पाएका थिए।

यस्तै, उपसभापति पदमा ११९ मतका साथ ईश्वरी लामिछाने, सचिवमा १०० मतका साथ शुभमकुमार गुप्ता र सहसचिवमा फारुक गुज्जर निर्वाचित भएका छन्। अन्य पदहरूमा जातीय प्रतिनिधि सदस्यतर्फ कमर जहाँ, दलित सदस्यतर्फ स्मृति नेपाली तथा खुला सदस्यतर्फ यमुनाकुमारी थापामगर, एकलाल थापा क्षेत्री र हेमराज बराल निर्वाचित भएका छन्। नवनिर्वाचित नेतृत्वले आगामी स्थानीय तहको निर्वाचनलाई लक्षित गरी सङ्गठन विस्तारमा जोड दिने बताएको छ।