टोकियोमा फेरि बढे सङ्क्रमित, बुधवार यो महिनाकै सबैभन्दा धेरै

प्रकाशित २०७७ चैत १२ बिहिबार

टोकीयो। जापानको राजधानी टोकियोमा कोरोनाभाइरसबाट दैनिक सङ्क्रमितहरूको सङ्ख्यामा फेरि वृद्धि भएको छ । सरकारी अधिकारीहरूले दिएको जानकारीअनुसार टोकियोमा बुधवार थप ४२० जना कोरोनाभाइरसबाट सङ्क्रमित भएका छन् ।

योसँगै राजधानी टोकियोमा अहिलेसम्म कूल सङ्क्रमितको सङ्ख्या एक लाख १८ हजार ४६१ पुगेको छ । टोकियोमा बुधवार दोस्रो पटक दैनिक सङ्क्रमितको सङ्ख्या ४०० नाघेको हो । यसअघि अघिल्लो एक दिनमा ४०९ जना सङ्क्रमित भएका थिए ।

सरकारी अधिकारीहरूका अनुसार राजधानी टोकियोमा गत मङ्गलवार ३३७ जना र सोमबार १८७ जना नयाँ सङ्क्रमित थपिएका थिए ।टोकियो क्षेत्रमा यसअघि लामो समयदेखि लागू गरिएको धेरै प्रतिबन्धात्मक व्यवस्थाहरू हटाइएपछि सङ्क्रमितहरूको सङ्ख्यामा फेरि वृद्धि भएको हो ।

कतिपय स्थानीय अधिकारीहरूले भने सार्वजनिक र ठुला कतिपय कार्यक्रमहरूका कारण सङ्क्रमण थप फैलिएको दाबी गरेका छन् । पछिल्लो सात दिनमा औसतमा ३०९.७ जना नयाँ सङ्क्रमित थपिएको पनि स्वास्थ्य अधिकारीहरूले जानकारी दिएका छन् ।

कोरोनाभाइरसबाट प्रभावित मुलुकहरूको सूचीमा जापान ३९औँ क्रममा पर्दछ । जापानमा अहिलेसम्म चार लाख ५७ हजार ७५४ जना सङ्क्रमित भएका छन् ।

त्यसै गरी कोरोनाभाइरसबाट सङ्क्रमित भएर आठ हजार ८६१ जनाको मृत्यु भएको जापानका अधिकारीहरूले जनाएका छन् ।