राष्ट्रपतिको कदम विरुद्ध झापामा नेविसंघको मसाल जुलुस

युवराज रेग्मी,

प्रकाशित २०७८ जेठ ९ आइतबार

झापा । राष्ट्रपति विद्यादेवी भण्डारीको अलोकतान्त्रिक र गैर संवैधानिक कदम विरुद्ध झापाको गौरादहमा नेविसंघले विरोध स्वरूप मसाल जुलुस प्रदर्शन गरेको छ ।

नेपाल विद्यार्थी सङ्घ गौरादह नगर समितिको आयोजनामा राष्ट्रपतिको अलोकतान्त्रिक कदमको विरोध गर्दै मसाल जुलुस प्रदर्शन गरेको हो ।

स्वतःस्फूर्त रूपमा बजारको मध्य भागबाट निस्किएको मसाल जुलुस सहितको र्‍यालीमा विद्यार्थीहरूले गैर संवैधानिक कदम विरुद्ध नाराबाजी समेत गरेका थिए ।

जुलुस पश्चात् विरोध प्रदर्शन स्वरूप गौरादहको डिपुचोकमा विरोध जनाउँदै विद्यार्थीहरूले राष्ट्रपति विद्यादेवी भण्डारीको संसद् विघटनको कदम असंवैधानिक र अलोकतान्त्रिक भएको ठहर गर्दै विरोध प्रदर्शन गरेका हुन् ।

कोरोना महामारीको विषम परिस्थितिमा मानव स्वास्थ्यको सुरक्षाको ग्यारेन्टी गर्नुको सट्टा ओलीको सरकार जोगाउन राष्ट्रपति कार्यालयको गरिमा समेत भुलेर विद्या भण्डारी लागेको ठहर गर्दै बिद्यार्थीहरुले संविधानको रक्षार्थ शक्ति प्रदर्शन गरेका हुन ।

नेविसंघ नगर सभापति बाबुराम नेपालको नेतृत्वमा निकालिएको विरोध जुलुसमा केपी ओली र विद्या भण्डारीको सेटिङमा मध्यरातमा भङ्ग गरिएको संसद विघटनको खारेजको माग गर्दै विद्यार्थीहरूले नाराबाजी गरेका थिए ।

विद्यार्थीको विरोध प्रदर्शनलाई इलाका प्रहरी कार्यालय गौरादहको टोलीले डिपुचोकमा हस्तक्षेप गरेको थियो ।