-
-
-
-
पाँचथर । पहिचान नभएको तरकारी खाएर सिकिस्त बिरामी भएका पाँचथरको फाल्गुनन्द गाउँपालिका वडा नम्बर ४ का एक ब्यक्तिको शुक्रबार बिहान मृत्यु भएको छ । मृत्यु हुनेमा फाल्गुनन्द वडा न. ४ चिलिङदेन साविक हेलाङ ७ निवासी ६७ वर्षीय लक्ष्मी नेम्बाङ रहेका छन् ।
गत हप्ता आफ्नै घरमा अनजानमा बिषालु तरकारी खाएर बिरामी भए लगत्तै विर्तामोडको बीएण्डसी हस्पिटलमा उपचाररत रहेका थिए । उपचारकै क्रममा शुक्रबार बिहान निधन भएको उनका भाइ लोकन नेम्बाङले जानकारी दिए ।
गत हप्ता एकै परिवारका घरमुली नेम्बाङसहित सात जनाले बिषालु तरकारी खाएर बेहोस हुने, बर्बराउने र वाकवाकी लाग्ने जस्ता समस्या देखिएपछि अस्पताल पठाइएको वडाध्यक्ष मनबहादुर चेम्जोङले बताए ।
परिवारका अन्य छ जना भने उपचारपछि निको भएर घर फर्किसकेका छन् ।
