स्थानीय तहलाई प्रदेश सरकार मातहत राख्ने गरी कुनै पनि सिफारिस भएको छैन: महामन्त्री खड्का
हाम्रा कुरा
प्रकाशित २०७८ साउन २४ आइतबार
764
Shares
काठमाडौं । नेपाली कांग्रेसका महामन्त्री पूर्णबहादुर खड्काले स्थानीय तहलाई प्रदेश सरकार मातहत राख्ने गरी कुनै पनि सिफारिस नभएको स्पष्ट पारेका छन् ।
स्थानीय तहलाई प्रदेशको क्षेत्राधिकारभित्र ल्याउने बिषय चर्चामा आएपछि खड्काले उक्त स्पष्टिकरण दिएका हुन ।
सरकारलाई सघाउन गठित कार्यदलका संयोजक खड्काले त्यस किसिमको कुनै सिफारिस नभएको भन्दै यस्तो कार्य संविधानविपरित हुने बताएका छन् ।
गाउँपालिका राष्ट्रिय महासंघ नेपाल, नेपाल नगरपालिका संघ र जिल्ला समन्वय समिति महासंघले संघीय सत्तारुढ गठबन्धनबाट सार्वजनिक साझा न्यूनतम् कार्यक्रममा ‘स्थानीय तहलाई प्रदेशको क्षेत्राधिकारभित्र ल्याउन आवश्यक कार्य गर्ने’ प्रावधान राखेकोमा आपत्ति जनाए लगत्तै उनको यस्तो धारणा आएको हो।
‘वर्तमान संयुक्त सरकारको साझा न्यूनतम कार्यक्रममा स्थानीय तहलाई प्रदेशको मातहत ल्याउन कार्यदलले सिफारिस गरेको भनी हिजोदेखि निरन्तर प्रचारित झूटा खबरबाट सिर्जित अन्योललाई प्रष्ट पार्नु हाम्रो कर्तब्य ठानेका छौँ’, खड्काले भनेका छन्, ‘संविधान विपरीतको सिफारिस कार्यदलले कल्पना गर्न सक्दैन।’
शनिबार मात्रै स्थानीय तहसँग सम्बन्धित तीन संगठनले राजधानीमा पत्रकार सम्मेलन गरेर सत्तारुढ गठबन्धनको प्रस्तावमा गम्भीर आपत्ति जनाएका थिए।
