मेस्सी नभएको बार्साको पहिलो जित, दुवै मड्रिडको विजयी सुरुवात
हाम्रा कुरा
प्रकाशित २०७८ साउन ३२ सोमबार
1k
Shares
काठमाडौं। स्पानिस फुटबल लिग (ला लिगा) मा मेस्सी बिनाको बार्सिलोनाले विजयी सुरुवात गरेको छ। निकै लामो समयपछि लियोनल मेस्सी विहीन बार्सिलोना खेल्दा कस्तो असर पर्ला भनेर समर्थकहरू उत्साहित देखिन्थे । मेस्सी नहुँदा पनि बार्सिलोनाले सहज जित हात पारेको छ।
बार्सिलोनाले रियाल सोसियदादलाई ४-२ गोलले पराजित गरेको हो। घरेलु मैदानमा खेलिरहेको बार्साले जेराड पिकेको गोलले अग्रता लिएको थियो। खेलको १९औं मिनेटमा मेम्फिस डिपेको असिस्टमा पिकेले गोल गरेका थिए।
त्यसैगरि मार्टिन ब्रेथवेटले ४५औं र ५९ मिनेटमा गोल गर्दै आफ्नो टोलीलाई ३-०को अग्रता दिलाएका थिए। खेलको ८२औं मिनेटमा सोसियोदादका जुलेन लोबेटेले गोल गर्दै खेलमा फर्किने संभावनाको ढोका खोलेका थिए। लगत्तै ८५ औं मिनेटमा मिकेल ओयरजाबलले गोल गर्दै स्थिती ३-२मा पुर्याएका थिए। खेलको ९०औं मिनेटमा सर्जी रोबर्टोले गोल गर्दै बार्सालाई ४-२को जित दिलाए।
उता रियाल मड्रिडले पनि लिगको सुरुवात जितबाट गरेको छ। डेपोटिभो अलावेसको घरेलु मैदानमा मड्रिड ४-१ गोलले विजयी भएको हो। मड्रिडको जितमा करिम बेन्जेमाले दुई गोल गरेका थिए भने नाचो फर्नान्डेस र भिनिसस जुनियरले १-१ गोल गरेका थिए।
गत सत्रको लिग बिजेता एथ्लेटिको मड्रिडले सेल्टा भिगोलाई २-१ गोलले पराजित गर्दै विजयी सुरुवात गरेको छ।
