उपेन्द्रको जसपा भन्दा हाम्रो पार्टी लोसपा 'स्ट्रोङ्ग' : महन्थ ठाकुर

निरञ्जन कुमार साह,

प्रकाशित २०७८ भदौ १६ बुधबार

जनकपुरधाम। जनता समाजवादी पार्टी (जसपा) उपेन्द्र यादवले लगेपछि लोकतान्त्रिक समाजवादी पार्टी (लोसपा) गठन गरेका महन्थ ठाकुरले यादव नेतृत्वको जसपा भन्दा आफ्नो पार्टी मजबुत रहेको दाबी गरेका छन् । बुधवार जनकपुरधाम विमानस्थलमा सञ्चारकर्मीसँग कुराकानी गर्दै अध्यक्ष ठाकुरले यस्तो दाबी गरेका हुन् ।

ठाकुरले भने,’उपेन्द्र यादव नेतृत्वको जनता समाजवादी पार्टी भन्दा आफ्नो पार्टी मजबुत छ। हाम्रो बारेमा कसैले विश्लेषण गरेर हुँदैन, हामी जसपा भन्दा स्ट्रोङ्ग छौँ ।'

जसपा विभाजन पश्चात् नयाँ दल रोज्नका लागि जनप्रतिनिधि तथा प्रदेशसभा सदस्यहरू जिल्ला निर्वाचन कार्यालयमा गई सनाखत गरिरहेको अवस्थामा लोसपाका केन्द्रीय नेताहरू जनकपुरधाम आएका हुन् ।

तत्कालीन राजपा नेपालबाट निर्वाचित अधिकांश जनप्रतिनिधि तथा प्रदेशसभा सदस्यहरू जसपामै रहेको समयमा लोसपाका अध्यक्ष ठाकुर, वरिष्ठ नेता शरतसिंह भण्डारी र राजेन्द्र महतोको जनकपुरधाम आगमनलाई महत्त्वका साथ हेरिएको छ।