खोकी र ज्वरो आएर अस्पताल पुर्याइएकी कृष्टिनाको इन्जेक्सन लगाए लगत्तै मृत्यु
पाँचथर अस्पताल दिनभर तनावग्रस्त
जितेन्द्र भण्डारी,
प्रकाशित २०७८ असोज २० बुधबार
821
Shares
पाँचथर । उपचारको क्रममा एक बालिकाको ज्यान गएपछि जिल्ला अस्पताल पाँचथर बुधवार दिनभर तनावग्रस्त बनेको छ । इन्जेक्सन लगाए लगत्तै तीन बर्षीया बालिका कृष्टिना थाम्सुहाङको निधन भएपछि मृतकका आफन्तले छानबिनको माग गर्दे आक्रोशित बनेका हुन् ।
फालेलुङ गाउँपालिका ८ स्थायी घर भई फिदिम नगरपालिका २ पल्लोटारमा बसोबास गर्दै आएका मृतक बालिका कृष्टिनाका बुवा कमल थाम्सुहाङले स्वास्थ्यकर्मीको लापरबाहीका कारण छोरीको ज्यान गएको आरोप लगाएका छन् ।
‘सामान्य खोकी र ज्वरो आएपछि उपचारका लागि मङ्गलवार बिहान कृष्टिनालाई अस्पताल भर्ना गरिएको थियो । स्वास्थ्यकर्मीले कृष्टिनालाई इन्जेक्सन लगाउने बित्तिकै उनी बेहोस बनिन् ।’ इन्जेक्सन लगाउने बित्तिकै बेहोस बनेकी कृष्टिनाको केही समयमै ज्यान गएको उनका काका युवराज थाम्सुहाङले बताए ।
अस्पताल आएपछि स्वास्थ्यमा सुधार आएर बुधवारै डिस्चार्ज गर्न लागिएकी कृष्टीकालाई राउन्डमा आएका चिकित्सकले सुइँ लगाइदिए लगत्तै निधन भएको हो । बेडमा आमासँग गफ गर्दै खाजा खाएकी कृष्टिना सुइँ लगाउने बित्तिकै चिच्याएर बेहोस भएको २ मिनेट नबित्दै निधन हुनुमा स्वास्थ्यकर्मीको लापरबाही भएको काका युवराजको भनाई छ ।
अस्पतालले चित्तबुझ्दो जवाफ सहित घट्नाको यथार्थ सार्वजनिक नगरेसम्म शव नबुझ्ने उनीहरूको भनाई छ । स्वास्थकर्मीहरुले भने एनाफाइलाटिक सकका कारण बालिकाको निधन भएको हुनसक्ने बताएका छन् । समस्या समाधानका लागि ५ घण्टादेखि वार्ता जारी रहे पनि कुनै निष्कर्ष निस्केको छैन ।
