काठमाडौँ। नेपाल सिआरएस कम्पनीले पहिलो पटक डडेलधुरामा ‘फ्रीडम’ ब्रान्ड नामबाट वातावरण मैत्री सेनिटरी प्याडको सुरु गरेको छ। बिहीवार डडेलधुराको अमरगढी नगरपालिका–७ पोखरामा रहेको उग्रतारा माविमा एक कार्यक्रमका बीच सेनिटरी प्याडको सुरु गरेको हो। अमरगढी नगरपालिकाका नगरप्रमुख विशेश्वरप्रसाद ओझा, जर्मन दूतावासका उपप्रमुख साइमन हेन्केले, केएफडब्लुका प्रमुख  शंकरराज पाण्डेय, मिस नेपाल वर्ल्ड २०१५ इभाना मानन्धर लगायतले विद्यालयका छात्राहरूलाई एक साथ प्याड हस्तान्तरण गर्दै शुभारम्भ गरेका हुन्।

ग्रामीण क्षेत्रमा मातृ तथा बाल शिशु स्याहार सुधार आईसिएमसिसिआर कार्यक्रम अन्तर्गत महिला तथा किशोरीहरूको महिनावारी स्वच्छता व्यवस्थापन र सुधारका लागि वातावरण मैत्री सेनिटरी प्याडको सुरु गरिएको हो।

नेपाल सरकार स्वास्थ्य तथा जनसङ्ख्या मन्त्रालय र जर्मन सहयोग केएफडब्लुबीचको सहकार्यमा प्याडको सुरु गरिएको सिआरएसका प्रबन्ध निर्देशक जीवलाल पोखरेलले जानकारी दिएका छन्। यो कार्यक्रम सुदूरपश्चिम प्रदेशको डडेलधुरा सहित बैतडी, डोटी र बझाङमा लागू छ। यस कार्यक्रमले विद्यालयका छात्रा लगायत महिलाहरूमा महिनावारीका बेला सकारात्मक परिवर्तक ज्ञान दिने अपेक्षा लिइएको छ।

कार्यक्रम सञ्चालन भएका जिल्लामा वातावरण मैत्री प्याड सुथत मूल्य र सहजै उपलब्ध गराउनुका साथै महिनावारी भएका बेला स्वस्थ रहन र स्वच्छ वातावरण बनाउन व्यवस्थापनमा सहयोग पुगाउने लक्ष्य लिइएको छ।

अमरगढी नगरपालिका डडेलधुराका नगर प्रमुख विशेश्वर प्रासद ओझाले नेपाली समाजमा व्याप्त सामाजिक विभेद अन्त्य गर्न बायोडिग्रेडेबल प्याडले सामाजिक बजारीकरणले महत्त्वपूर्ण भूमिका खेल्ने बताए। साथै, यो भेदभाव अन्त्य गर्न सबै जना विशेष गरी समुदायका पुरुष सदस्यहरू एकजुट हुनुपर्ने बताए।

विकास संस्थानका उपप्रमुख साइमन हेन्केलेले डडेलधुरामा बायोडिग्रेडेबल प्याड सुरु गरेकोमा सीआरएसलाई बधाई दिएका छन्। विद्यालयमा निःशुल्क प्याडसहित नेपालले उल्लेख्य प्रगति गरेकोमा उनी प्रभावित भएको समेत बताएका छन्। यसका बाबजुद पनि नेपालमा धेरै केटी तथा महिलाले महिनावारीका कारण समस्या भोग्नुपरेको बताउँदै केटी र केटा दुवैलाई यस विषयमा सिकाउनु महत्त्वपूर्ण रहेको बताएका छन्। जर्मन विकास सहयोगले नेपालको यो महत्त्वपूर्ण विषयमा सहयोग गर्न पाएकोमा खुसी रहेको समेत बताए।

कार्यक्रममा मिस नेपाल वर्ल २०१५ इभाना मानन्धरले महिनावारीलाई एक वरदानको रूपमा लिनुपर्ने बताइन्। ‘यो एक प्राकृतिक प्रक्रिया हो’ यसमा भेदभाव गर्नु हुदैन् भन्दै हरेक पुरुषहरूले आफ्ना परिवारका महिला सदस्यहरूलाई सम्मान पूर्वक व्यवहार गर्न अनुरोध समेत गरिन्।

नेपाल सिआरएस कम्पनीका प्रबन्ध निर्देशक जीवलाल पोखरेलले नेपालका चार जिल्लामा जर्मन विकास बैङ्कको आर्थिक सहयोगमा कम्पनीले बायोडिग्रेडेबलको मार्केटिङ सुरु गर्ने बताए। कार्यक्रम कार्यान्वयन साझेदार संस्था बहुउद्देश्यीय विकास समाज डडेलधुराको सहयोगमा प्याडहरू सिआरएस द्वारा मार्केटिङ गरिने समेत उनले बताएका छन्।

नेपाल सीआरएस कम्पनीले सामाजिक बजारीकरणको सिध्हांत अनुसार विगत चार दशक भन्दा अघिदेखि  परिवार योजना, मातृ तथा बाल स्वास्थ्य र यौन रोगको रोकथामका साधनहरूको बिक्री वितरण तथा व्यवहार परिवर्तन सम्बन्धी कार्यक्रम सञ्चालन गर्दै आएको छ। यस कम्पनीबाट वितरित परिवार योजनाका साधनहरू नेपालको ७७ ओटै जिल्लामा उपलब्ध छन्।

नेपाल सीआरएसद्वारा वितरित गरिएका केही प्रतिष्ठित ब्रान्ड ढाल, प्यान्थर, संगिनी तिन महिने सुइँ , निलोकन व्हायिट, सुनौलो गुलाफ, नव जीवन तथा आकस्मिक गर्भ निरोधक चक्की ईकोन रहेका छन्।