उदयपु्रगढीमा ट्याक्टर दुर्घटना :दुईको मृत्यु, डेढ दर्जन व्यक्ति घाइते

हाम्रा कुरा

प्रकाशित २०७८ मंसिर २ बिहिबार

उदयपुर । उदयपु्रगढी गाउँपालिका-६ दनुवारबेँसीमा बिहीबार बिहान ट्याक्टर दुर्घटना हुँदा गम्भीर घाइते भएका चालकसहित दुई जनाको मृत्यु भएको छ भने अन्य डेढ दर्जन व्यक्ति घाइते भएका छन् ।

दुर्घटनामा घाइते भएका त्रियुगा नगरपालिका-९ गैरुन बस्ने ४० वर्षीय बौवा सदाको उपचारका क्रममा जिल्ला अस्पताल उदयपुरमा र ट्याक्टर चालक त्रियुगा नगरपालिका-१० करमगाछीका २० वर्षीय दिवस सार्कीको उपचारका क्रममा विटानगरस्थित न्युरो अस्पतालमा मृत्यु भएको जिल्ला प्रहरी कार्यालय उदयपुरले बताएको छ ।

दुर्घटनामा गैरुनकै १६ वर्षीय सकुन सदासहित अन्य डेढ दर्जन व्यक्ति घाइते भएका छन् तीमध्ये पाँच जना गम्भीर रहेको र उनीहरूको विराटनगरमा उपचार भइरहेको छ ।

अन्य घाइतेको जिल्ला अस्पतालमा उपचार भइरहेको जिल्ला प्रहरी कार्यालय उदयपुरका प्रहरी नायब उपरीक्षक वेदप्रसाद गौतमले बताए।

गाईघाटबाट जिल्लाको पश्चिमी पहाडी क्षेत्रको ताप्लीस्थित रुपाटार जाँदै गरेको प्रदेश२-०१-००१-त १०८३ नंको ट्याक्टर बिहान ९ः३० बजे उदयपुर गढी गाउँपालिका-६ दनुवारबेँसीमा दुर्घटना भएको प्रहरीले जनाएको छ ।