७ करोड वर्ष पुरानो डाइनसोरको भ्रूण सुरक्षित फेला पर्यो
हाम्रा कुरा
प्रकाशित २०७८ पुष ७ बुधबार
268
Shares
काठमाडौं । वैज्ञानिकहरूले सुरक्षित रूपमा रहेको ६ करोड ६० लाख (करिब ७ करोड) वर्ष पूरानो डाइनसोरको भ्रूण फेला परेको घोषणा गरेका छन् ।
कुखुराको जस्तै आफ्नो अण्डाबाट बाहिर निस्कने तयारीमा रहेको उक्त भ्रूण दक्षिणी चीनको गान्झोउमा फेला परेको अन्वेषकहरूले बताएका छन् ।
दाँतविहीन थेरोपोड डाइनसोर अथवा ओभिराप्टोरोसौर प्रजातिको यो डाइनसोरको भ्रूणलाई अन्वेषकहरूले बेबी यिंगलिआङ नाम दिएका छन् ।
बर्मिंघम विश्वविद्यालयका अनुसन्धानकर्ता डा फिओन वैसुमले 'इतिहासमा फेला परेको डाइनसोरको भ्रूण मध्ये यो सबैभन्दा राम्रो' रहेकाे बताएका छन् ।
यसबाट हालका चरा र डाइनसोरबीचको अन्तरसम्बन्धबारे थप जानकारी हासिल हुने बताइएको छ । योभ्रूणचराको चल्लाहरू अण्डाबाट बाहिर निस्किने बेलाको अवस्थामा झैं रहेको पाइएको छ ।
ओभिराप्टोरोसोर अर्थात् प्वाँख भएका डाइनसोरहरू १० करोड देखि करिब ६ करोड ६० लाख वर्षअघि अहिलेको एसिया र उत्तर अमेरिकामा बसोबास गर्ने गरेको अनुमान छ ।
अझैं ढुङ्गामाथि रहेको डाइनसाेरको भ्रूणको कङ्काल
टाउकोदेखि पुच्छरसम्म २७ सेन्टिमिटर लामो यो भ्रूण १७ सेन्टिमिटर लामो अण्डाभित्र रहेको छ । यो अण्डा सुरुमा सन् २००० मै फेला परेको थियो ।
तर, अहिले म्युजियमको पुनर्निर्माण क्रममा पुराना जीवाश्महरू क्रमबद्ध गरिँदा अनुसन्धानकर्ताहरुले अण्डाभित्र भ्रूण रहेको हुनसक्ने आशङ्का गरेपछि यो फेला परेको हो ।
डाइनसोरको भ्रूणको आधा भाग अझैं ढुङ्गामाथि रहेको छ । अनुसन्धानकर्ताहरूले यसको पूर्ण कङ्कालको चित्र बनाउन आधुनिक स्क्यानिङ प्रविधिकाे प्रयोग गर्नेछन् ।
