गाडीले ठक्कर दिँदा मोटरसाइकल चालकको र साइकलले ठक्कर दिँदा बटुवाको मृत्यु

हाम्रा कुरा

प्रकाशित २०७८ पुष ११ आइतबार

सर्लाही । पूर्व–पश्चिम राजमार्ग अन्तर्गत सर्लाहीको बाँके जंगलमा गएराति भएको सवारी दुर्घटनामा एक जनाको ज्यान गएको छ । दुर्घटनामा एक जना घाइते भएका छन् । राति १० बजेतिर घारिबथान जाने बाँके चौक नजिकै बर्दिवासबाट लालबन्दीतर्फ आउँदै गरेको ना ३४ प ७०२१ नं को मोटरसाइकललाई नम्बर र आकार खुल्न नसकेको गाडीले ठक्कर दिएको प्रहरीले जनाएको छ ।

दुर्घटनामा मोटरसाइकलको पछाडि सवार सुर्खेत जिल्ला घरभइ हाल लालबन्दीमा बस्दै आएका अन्दाजी ५६ वर्षका भिम गुरुङको ज्यान गएको इलाका प्रहरी कार्यालय केशरगन्जले जनाएको छ ।

सो दुर्घटनामा मोटरसाइकल चालक लालबन्दी नगरपालिका–३ बस्ने ४२ वर्षीय जितन चौधरी घाइते भएका छन् । चौधरीको मोडेल अस्पताल लालबन्दीमा उपचार चलिरहेको प्रहरीले जनाएको छ ।

प्रहरीले रातिदेखि नै दुर्घटनामा संलग्न सवारीको खोजी तीव्र पारेको छ ।

यसैबीच नवलपुर–मलंगवा सडक खण्ड अन्तर्गत गए साँझ हरिपुर नगरपालिका–६, लक्ष्मीपुरमा साइकलको ठक्करबाट एक महिलाको ज्यान गएको छ ।

बाटो काट्ने क्रममा साइकलले ठक्कर दिँदा टाउकोमा चोट लागेर गम्भीर घाइते भएकी लक्ष्मीपुरकी ५५ वर्षीया सैफुल खातुनको उपचारका क्रममा राति प्रादेशिक अस्पताल जनकपुरमा ज्यान गएको प्रहरीले जनाएको छ ।

महिलालाई ठक्कर दिने साइकल चालकलाई प्रहरीले नियन्त्रणमा लिएको छ ।